Governor’s Rule-a CADC dah lâwm

Chakma Autonomous District Council (CADC) chu Governor’s Rule-ah dah a ni a; BJP party chuan nimin khan Governor's Rule-a dah lawmna Chawngte-ah an buatsaih a, BJP MLA leh CADC BJP presient Dr BD Chakma bakah, BJP National Council member Nirupam Chakma ten thu an sawi.

Dr BD Chakma chuan, Governor's Rule-ah CADC term 10-na kal mek dah a ni chu lawmawm an tih thu leh thutlukna siamtu Governor chungah an lawm thu a sawi a, "Thutlukna hi CADC-ah sorkar ngelnghet zawk a din theihna tura hmalakna a ni," a ti.

CADC term 10-naah sorkar a ding nghet lo hle tih sawiin BD Chakma chuan, Governor's Rule-a dah a nih avangin CADC-a MNF MDC 20-te'n an thil tih dik loh ṭhinah an inhmuh chhuah a beisei thu a sawi bawk.

CADC hi December 16, 2022 khan Governor's Rule-ah dah a ni a, dan ang chuan, thu dang a awm loh chuan Governor's Rule-ah thla ruk chhung a awm dawn a ni.