Vaihlo, zu leh ruihhlo ti ṭhin zirlai zingah lei ṭhin leh in lam aṭanga ti ṭan an tam

Mizorama middle school, high school leh higher secondary school zirlai, kum 10-17 inkar zingah vaihlo, zu leh ruihhlo ti ṭhin eng emaw zat an awm a, chu'ng zingah chuan a zuartute hnen aṭanga lei ṭhin leh an in lama ti ṭhin an awm vanga chíng zui ve ta an tam tih hmuh chhuah a ni.

Social Welfare & Tribal Affairs department hnuaia Mizoram Social Defence & Rehabilitation Board (MSDRB)-in naupang leh tleirawl kum 10-17 inkara ruihhlo hman sual chungchang zirchianna, Survey Report on Drugs and Children in Mizoram 2022 a tihchhuaha tarlan danin, M/S zirlai 6,233, H/S zirlai 2,093 leh HSS zirlai 2,447, an vaiin zirlai 10,773 zir chian a ni a; zir chian zingah ruihhlo ti ṭhinte tih ṭanna tam ber chu a zuartute hnen aṭanga an lei a ni a, ina an chênpuite zingah ti an awm vanga chíng ve tate'n an dawt.

Zirlai zinga ruihhlo ti ṭhin zingah 2,651 chuan ruihhlo zuartute hnen aṭangin an lei ṭhin a; sikul páwn lama an ṭhiante vanga ti ve mi 622, sikula an ṭhiante tih vanga ti ve mi 421 leh an chenpuiteah ti an awm avanga ti ve ṭhin mi 419 an awm a ni.

Zirlai tleirawl zu in ṭhin zingah zirlai 361 chuan an chenpui zinga zu in ṭhinte avangin an in ve ṭan a, zu zuarte aṭanga lei ṭhin mi 2,993, sikul páwn lama an ṭhiante vanga in ve ṭan mi 596 leh, sikula an ṭhiante'n an in avanga in ve ṭhin mi 323 an awm.

Vaihlo ti ṭhin zirlai zinga 4,057 chuan dawr aṭangin an lei a; an chenpuite tih ṭhin aṭanga ti ve mi 920, sikul páwn lama an ṭhiante vanga ti ṭhin mi 459 leh sikula an ṭhiante tih vanga ti ve mi 555 an awm bawk.