Ruihhlo do chungchang ngaihtuah

Champhai District Nasha Mukt Bharat Abhiyaan Committee chu nimin khan an chairman James Lalrinchhana, district bawrhsap kaihhruaiin DC conference hall-ah an ṭhukhawm a; Champhai leh Khawzawl district-a ruihhlo do chungchang an ngaihtuah.

Nasha Mukt Bharat Abhiyaan Committee hi ruihhlo leh a kaihhnawih hrang hrang laka India ram a fihlim theihna tura sorkar laipuia Ministry of Social Justice & Empowerment leh Mizoram sorkara Social Defence & Rehabilitation Board ṭangkawp hnuaia National Action Plan for Drug Demand Reduction (NAPDDR) hmalakna, Nasha Mukh Bharat- Drug Free India Campaign kalpui tura din a ni.

Ṭhutkhawma tarlan danin, June 2021 aṭanga December 2022 chhungin District Nasha Mukh Bharat Abhiyan Committee bultumin zirna-in 76-ah peer volunteer 50-te'n Drug Prevention Awareness Campaign an nei a, August 30, 2022 khan zawh niin, student's club/ NMBA club-te din a ni.

Khawtlang huap drug prevention awareness campaign leh media campaign neih ṭhin a ni a; Champhai District Hospital nen ṭangkawpin ruihhlo ngaite tan health camp buatsaih a ni. International Day Against Drug Abuse & Illicit Trafficking pualin Drug Prevention Awareness Rally leh zirlaite pual ruihhlo ti lo tura thutiam lakna hun buatsaih a ni bawk.

NMBA kaltlangin master trainer-te'n high school 30-a zirtirtute tan Drug Prevention Awareness Training an buatsaih a; Champhai College nen ṭangkawpin thisen pek rûnpui buatsaih a ni.

NMBA-Drug Free India Campaign hnuaiah India rama district 372-ah ruihhlo do hmalakna kalpui mek a ni a; Mizoramah chuan drug hluarna district nia tarlan - Aizawl, Kolasib leh Champhai district-ahte kalpui mek a ni.