KHAWTHLIR

Minister-ah Rinawma Lakluh a ni dawn
Tuikum bialtu MLA Lalrinawma chu vawiin chawhma dar 11 hian Governor-in minister atan a la lut dawn. Minister lak luhna inkhawm hi Raj Bhavan Circular Lawn-ah neih a ni ang. Lalrinawma hi sorkar term kal mekah deputy speaker a ni ṭhin a, a nihna aṭangin December 15, 2022 khan a báng a ni.

Thisen pe
Serchhip College NSS unit chuan nimin khan an college hall-ah voluntary blood donation camp an huaihawt a, Serchhip District Hospital tan thisen unit 12 an pe. HBK MMA Gym, Kulikawnin Synod Hospital blood bank-ah thisen unit 9 an pe bawk.

Inhlawhna siamsak
Deputy chief minister Tawnluia chuan a bial, Tuichâng constituency chhung khaw hrang hranga mite tan Krismas pualin inhlawhna a siamsak a, mi ṭhahnem tak an inhlawh a, niminah pawh Khawzawl khawpui veng hrang hrangah an inhlawh. Inhlawhna siamna atan hian MLA fund cheng nuai 25 ruahman a ni.

Kohhrante ngen
Kolasib bawrhsap John LT Sanga chuan, Kolasib khawpuia kohhran hrang hrangte chu Krismas leh kum thar lawmna ruai ṭhehnaah plastic aṭanga siam hman khat daih thilte hmang lo tur leh, hman nawn theih chite hmang turin a ngen.

Tanpuina sem
Central YMA chuan Zofate Chhanchhuahna Camping Organising Committee aṭangin camping sum hman bâng Rs 6,00,000 a dawng a; chuta ṭang chuan Rs 1,00,000 chu CADS hman atan dahin, Rs 5,00,000 chu Aizawla YMA branch-te hnenah khawsak harsate ṭanpuina atan Rs 4,000 ṭheuh an pe. CYMA hian kumin chhung atan CYMA Office chu nimin khan an khâr a ni.

Biate-ah YMA General Conference
Kum 2023-a YMA General Conference vawi 74-na chu Biate-ah nghah a ni dawn tih Central YMA chuan an tarlang. YMA General Conference 2023 hi Manipur-a nghah tura rêl a lo ni tawh a, a remchan leh dawn loh avangin YMA Central Executive Committee chuan Biate-a nghah turin a rêl a ni.

Kolasib-ah No Vehicle Zone
Kolasib SP chuan, December 23-24, 2022 chhungin chhun lamah Kolasib Diakkawn Bazar chu lirthei kal theih lohna, No Vehicle Zone-ah puan a nih dawn thu a tarlang.

Khawl sem
Social Welfare & Tribal Affairs department leh National Institute for the Empowerment of Persons with Visual Disabilities, Dehradun chuan nimin khan SWTA conference hall-ah pianphunga rualbanlote mamawh khawl semna hun an buatsaih a, SWTA secretary Arun Mishra-a'n a hmanpui. Mi 25 hnenah a thlawnin laptop pali leh mobile phone 21 pek a ni.