Lungawi lohna lantirna atan doctor-te'n badge dum an bel dawn

All India Federation of Government Doctors Association (AIFGDA) chuan, lungawi lohna lantir nan vawiin hian India ram pumah badge dum an bel dawn a, Mizoram Government Doctors' Association (MDGA) pawhin an zawm ve dawn.

MGDA general secre­tary Dr C Lalchhandama chuan, AIFGDA-in lung­awi lohna an lantir tur MGDA-in an zawm ve dawn thu leh vawiinah badge dum an bel dawn thu hi nimin khan Health Secretary hnenah lehkha thawnin a hriattir a; hemi rual hian, MGDA member-te chu vawiinah badge dum bel vek turin a hriattir bawk.

AIFGDA thuchhuahin a tarlan danin, India ram puma sorkara thawk doctor-te'n badge dum bela lungawi lohna an lantir chhan tur chu - Rajasthan state sorkarin a hnuaia thawk doctor-te laka thil a tih dan duh loh vang a ni a; AIFGDA chuan Rajasthan sorkar chu doctor-te chunga a thil tih sût turin an phût a ni.

Tun hnai khan Ra­jasthan sorkara thawk doctor-te'n lungawi lohna an lantir a, an inbiakrem hnuah doctor-te chuan lungawi lohna lantir an titawp a ni. Lungawi lohna lantir tihtawp hnuah Rajasthan sorkar chuan doctor-te thil phût chu a tihpuitling lo mai ni loin doctor ṭhenkhat chu man an ni ta zawk niin AIFGDA thuchhuah chuan a tarlang.