Little Free Library hawng

New Market Office-a Little Free Library siam chu nimin khan Art & Culture director R Hmingthanzuala'n a hawng. Hetiang library hi India ramah Mumbai, Chennai leh Bangalore-ahte a awm tawh a, Mizoram hi a palina a ni.

R Hmingthanzuala chuan, Little Free Library chu mipui tan kawng ṭha kawh hmuhtu a nih a, finna kailawn atan hmang ṭangkai a duh thu a sawi a, "Little Free Library hi a awmna hmun hnaia mite'n awlsam taka lehkhabu chhiar tur an hmuh theih nan leh an hman ṭangkai theih nan din a ni a, New Market-a ni tin eizawngtute'n ṭangkai taka an hman ka beisei," a ti.

Little Free Library hi hlawkna um loa pawl (non-profit organisation) din a ni a; United States mi, Todd Bol an kum 2009-a a din niin, khawvelah 50,000 a awm tawh. He library-a lehkhabu hawh tur hian member nih a ngai lo a, a duh leh mamawhtu apiangin a thlawna an hawh theih tura ruahman a ni a, lehkhabu hawh chhuaktute'n an chhiar zawha dah kîr leh tur a ni.

Nimin vek khan Mizoram University Park-ah Little Free Library dang hawn a ni bawk.