Khawzawlah Walkathon huaihawt a ni

India rama khawpui fai inelna, Swachh Survekshan 2018 neih tur pualin Khawzawl Sanitation Task Force chuan nimin zing khan Khawzawl khawpuiah faina kawngzawh, Walkathon an huaihawt.

Walkathon hi zing dar 6:30-ah Taidawnkawnah ṭan a ni a; kawngzawh ṭan hmaa inkhawm tâwiah Khawzawl BDO Lalremruata Sailo, Khawzawl Sanitation Task Force chairman chuan, Swachh Survekshan atana Khawzawl khawpui inpuahchah dan sawiin, mipuite'n fai duh tak takna thinlung an put theihna tura infuih nan kawngzawh huaihawt a nih thu a sawi.

Walkathon-ah hian Taidawnkawn aṭanga Chhûmliamkâwn thleng an kal a, Chhumliamkâwnah inkhawm tawi neih leh niin, brand ambassador B Lalzethanga'n fuihna thu a sawi a ni.

Swachh Survekshan 2018 hmachhawn tura Khawzawl a inbuatsaihnaah tun hnai khan veng, zirna in, pisa leh hotel/restaurant fai thlanna buatsaih a ni a; December 18, Thawhṭannia result puan inkhawmah Khawzawl Field No. 1 leh Taidawnkawn inkar chu bawlhhlawh paih phal lohna hmun, No Littering Zone-ah an puang nghal a ni.