Congress ṭhalaite'n lawmthu an sawi

Congress party ṭha­lai, Mizoram Pradesh Youth Congress Committee chuan thu­chhuah siamin, kum 2017 chhunga Congress kaihhruai Mizoram sorkar hmalakna hrang hrangah Pathian awmpuina leh kaihhruaina an dawn avangin lawmawm an tih thu an tarlang a, "Kan hmalaknaa min ṭawiawm ṭhintute zawng zawng chungah thinlung takin lawmthu kan sawi a ni," an ti.

MPYCC chuan, Lal Thanhawla kaihhruai Mizoram sorkarin kawng hrang hranga hmasawnna leh hlawh­tlinna a nei nia sawiin, ropui an tih thu leh an chhuan hle thu an sawi a ni.

MPYCC tarlan danin, NLUP ṭanpuina chu Mizorama chhung­kua 2,21,077 (census 2011) zinga chhung­kaw 1,31,521-in an dawng tawh. NLUP chu chhungkaw ṭha­hnem takin eizawnna ngêlnghet neih phah nan an hmang nia sawiin, "Pu Lal Thanhawla kaihhruai sorkarin a taka mipuite hmangaihna a lanna a nih avang­in thil lawmawm tàwp a ni," an ti.

Congress ṭhalaite chuan, Tuirial Hydro Electric Power Project, MNF party sorkarin zangnadawmna an inpek nasat vanga an tihchhiat vek hnua Congress sorkarin a tharthawh leh a, prime minister Narendra Modi-a'n a hawng ta leh hman a ni ta chu lawmawm an tih thu an tarlang a; State referral Hospital pawh MNF sorkarin an sawp chhiat vek hnua Congress sorkarin changtlung taka a siam chho leh chu lawmawm an tih thu an sawi bawk.