Serthlum huan neitu Biaka chawimawi

North Vanlaiphai khuaa serthlum hlawhtlinpuitu, HC Lalbiaka chu December 17, 2017 khan Nagpur-a World Orange Festival-ah Dr. Shyam Singh Best Citrus Grower Award hlan a ni a, Union Agriculture minister Radha Mohan Singh hnen aṭang a dawng.

Award dawn pualin nimin khan Horticulture directorate committee room-ah Horticulture director Dr Elizabeth Saipari hoin lawmna hun hman a ni a; Dr Saipari chuan, Mizo zinga award dawng thei an awm lawmawm a tih thu a sawi a, sorkar hmalakna kut hnathawktute'n an tihpuitlin ṭhin vanga lawmthu sawiin, "NLUP-ah pawh lo neitute'n a hlawhtlin nan theihtawp kan chhuah avangin department pawhin hlawh­tlinna a nei zel a ni," a ti.

Dr Elizabeth Saipari chuan, kumin March thla aṭangin Mizoramah rua­htui a tam tih sawiin, serthlum huan neitute'n kum dang aiin an thar ṭha dawn lo niin a sawi a; a hun lo (off season) laia Tuipui khuain tomato an chîn hlawhtlin ang chu fûr lo awm leh turah Ser­chhip district chhungah chîn a nih tur thu a sawi bawk.

Award dawngtu HC Lalbiaka chuan, a ser­thlum huan enkawlnaah Horticulture department thawktute fakawm a tih thu sawiin, a hlawh­tlinna chu Horticulture department officer leh thawktute'n an harsatna a hmun ngeia an enpui peih reng vang a nih thu a sawi.

HC Lalbiaka hi Mizoramah serthlum budded chíng hmasa ber pawl a ni a, kum 2002-ah Myanmar aṭangin serthlum budded a la lut a ni. Tunah hian ram hectare 4 vela zauah serthlum kûng puitling 2,700 vel neiin, kum tin cheng nuai 7-12 inkar la lut ṭhin a ni.