Ultrasound-a hmalak zel dan tur sawiho
Nu nau paite ultrasound hmanga an nau pai mipa nge hmeichhe a nih enfiah a nih leh nih loh viltu State Supervisory Board under Pre-Conception & Pre-Natal Diagnostic Technique (Prohibition of Sex Selection) Act 1994 chu nimin khan CMO conference hall-ah an ṭhukhawm a; hmalak zel dan tur an sawiho.
Health minister Lal Thanzara chuan, state chhunga damdawi-in, health centre leh clinic-te endik tura National Inspection & Monitoring Committee an lo kal hmain sorkara inziak lut lo ultrasound awmna centre-te chu inziak lut (register) vek tur te, phalna la hmasa loa ultrasound lei zawng zawng lâk kîrte leh ultrasound hmang tur apiangte'n ‘Form F’ fill-up ngai pawimawh turin nasa lehzuala ṭan lak a ngaih thu a sawi.
Pre-Conception & Pre-Natal Diagnostic Technique (Prohibition of Sex Selection) Act 1994 bawhchhetute hremna a nat thu sawiin Lal Thanzara chuan, "Bail theih loh a nih bakah, sum chawi leh kum 5-6 tàn ngei ngeina a nih avangin, mipui bakah ultrasound khawihtute hrilhhriat nasat lehzual a ngai a ni," a ti a; kohhran hmeichhia leh tlawmngai pawlte hnenah an chanchinbua chhuah turin article ziaka pe turin a hrilh.
Minister Vanlalawmpuii Chawngthu pawhin thu sawiin, ram pumah Pre-Conception & Pre-Natal Diagnostic Technique (Prohibition of Sex Selection) Act khauh taka kenkawh mek a nih thu a sawi a, "Mizoramah pawh ultrasound khawihtu radiologist, gynaecologist leh doctor-te tan training leh sensitization buatsaih ni se, National Inspection Team lo kal hma ngeiin an mittlung tura tihfel ngai zawng zawng tifel a ngai a ni," a ti.
Meeting-ah hian, danin a phût anga sorkar leh private hospital, health centre leh clinic-te'n dan an zâwm ṭha em tih endik tura district tina kal inspection team-te report ngaihthlak a ni.
Phalna la hmasa loa ultrasound lei a, sorkara register loh awmna khua - Bungtlang South, Lungsen, Khawbung leh Khawzawla mite chu Health Directorate-ah an khawlte dah tura hriattir a nih thu meeting-ah hian tarlan a ni.
State Supervisory Board hi thla li chhungin vawi khat an ṭhukhawm ngei tur a ni a, an hmalaknate an thlirho ṭhin. Tun dinhmunah Mizoramah sorkara inziak lut ultrasound centre 50 a awm a, kumin chhungin registration thar paruk leh registration tihnun thar pasarih pek a ni.