Natna ûmbo dan tur sawiho

State Task Force Committee for Immunization (STFI) chu nimin khan an chairman Lalrinliana Fanai, Health secretary hoin a pisaah an ṭhukhawm a; Measles-Rubella Campaign neih tur chungchang an sawiho.

NPSP-WHO Surveillance medical officer Dr Lalhlimpuii chuan, measles (sentût) leh rubella (german sentût) natnate chu lan chhuah dan inang tak a nih thu a sawi a, "Kum 2010 aṭang khan India ramah sentût natna en thlithlaina (surveillance) neih ṭan a ni. Routine immunization-a measles vaccine chiah pek ṭhin chu Measles-Rubella vaccine-in thlak a ni tawh," a ti.

State immunization officer Dr Lalzawmi chuan, Intensified Mission Indradanush (IMI) first round aṭanga third round thleng thlir letna hun hmangin, MR campaign kalpui tura inpuahchahna a tarlang a, "Mizoramah chuan campaign hian nausen thla 9 aṭanga tleirawl kum 15 inkar mi 3,00,000 vel a huam dawn a ni," a ti.

Measles-Rubella Campaign hi January 2018-a ṭan tur a ni a, December 2019-ah chuan vaccine latu tur 90% la tawh tura ruahmanna siam a ni. Sorkar laipui chuan kum 2020-ah sentût ûmbo leh rubella (german sentut) khuahkhirh hman a tum.

Measles-Rubella Campaign hian a tum ber chu, sentût natna laka naupang ven a ni a, naupang a tam thei ang ber MR vaccine pek tum a ni.