KHAWTHLIR

Charity fund Hlan dawn
Mizoram Journalist Association (MJA) chuan an member leh páwn lam mi ṭhenkhatin an thawh khawm, Charity Fund-a sum an hmuhte chu vawiin chawhnu dar 1:30 hian Aizawl Civil Hospital Poor Fund atan an hlan dawn. Charity fund hlanna hun hi Medical Superintendent pisa-a neih tur a ni a, MJA member Aizawla awmte chu tel vek tura ngen an ni. MJA hian an Charity Fund hi ACH Poor Fund bakah Mumbai, Vellore leh Guwahati-a Mizo welfare-te hnenah an hlan tawh a ni. Charity fund-a tling khawm zawng zawng chu nimin tlai thleng khan Rs.1,06,365 a ni.

IPR director thlah
Information & Public Relations department director Lalnithangi chu kumin kum tawpah superanuation pension-in a chhuak dawn a, nimin khan IPR department-a thawkte leh MJA hruaitute'n an thlah. Thlahna inkhawm hi IPR joint director David M Thangliana'n a kaihruai a, joint director Lallianpuii leh MJA president Vanlalrema Vantawl-te bakah, mi hrang hrangin thu an sawi a ni.

Pisa khar
Mizoram Upa Pawl (MUP) chuan nimin khan kumin atana pisa kharna inkhawm buatsaih pahin, Pathian hnena lawmthu sawina leh infuihtharna hun an hmang a, Krismas leh kumthar hlim taka hmang turin mipuite'n duhsakna an hlan. MUP pisa hi January 10, 2018 ah hawn leh tur a ni.

Hrem phut
ASEP chuan thuchhuah siamin, Dampa Tiger Reserved-a ngau (capped langur) kah hlum a ni chu pawi an tih thu an tarlang a, "Nungcha humhalh nasa taka khawvelin a buaipui mek tawh hunah pawh kan protected area meuh pawh a la him lo hi a pawi tak zet a ni," a ti a; thil tisualtute chu The Wildlife (Protection) Act, 1972 in a sawi angin case siam sak ngeia, an chungah an phu ang tawk hremna lek kawh ngei an phut a ni.