MJA-in ACH-ah Charity Fund an hlan

MJA general headquarters chuan nimin khan Charity Fund atana sum an thawh khawmte chu Aizawl Civil Hospital (ACH) Poor Fund-ah an hlan.

Charity Fund atan hian MJA member-te'n sum an thawh khawm a, MJA member ni lo mi ṭhahnemngaite'n an thawh bawk a, a vaia tling khawm zat chu Rs. 1,06,365 a ni.

Sum tling khawm zinga Rs. 36,365 chu ACH Poor Fund-ah an pe a, a hmain Guwahati Mizo Welfare hnenah Rs. 30,000, Mumbai Mizo Welfare hnenah Rs. 20,000 leh Vellore Mizo Welfare hnenah Rs. 20,000 an pe tawh bawk.

MJA Charity Fund hlanna inkhawm hi ACH Medical Supe­rintendent pisaah neih a ni a; MJA president Vanlalrema Vantawl-in ACH deputy medi­cal superintendent Dr John Zo­hming­thanga hnenah a hlan.

MJA President chuan, Mizote hmasawnna chu Krismas chauh ni lo, hunpui leh ni bik angahte mi dang tana malsawmna nih an tum tlat ṭhin chu a ni tih sawiin, "Krismas vuakvetah phei chuan mi tam takin an neih vang ni loin, mi dang tana luan chhuah an duh vangin mi harsa zawk an pui ṭhin a, hei hi Krismas thu ken dik tak a ni a, uar zela chhunzawm zel tlak a ni. Mizo zia nen a inhmeh a, Kristianna nen pawh a inzâwl thlap a ni," a ti.

Dr John Zohmingthanga chuan, mi harsa, RSBY hnuaia inziak lutte'n a thlawnin inenkawlna dawng thei mah se, mi harsa ve tho, RSBY leh sorkar policy danga inziah luh nachang hre lo mi eng emaw zat an awm avangin Poor Fund chu ṭangkai taka hman ṭhin a nih thu a sawi.

MJA Gen.Hqrs. hian kum 2012 aṭangin kum tin Krismas dawnah Charity Fund tur an thawh khawm ṭhin a; kum 2012-ah Rs. 40,000 an hmuh chu ACH Poor Fund leh ZDU Damna In ṭanpui nan Rs. 20,000 ve ve an pe a, kum 2013-ah Rs. 71,170 hmuin, Hermon Childrens Home hnenah Rs. 40,000 leh an member zinga harsa zualte an ṭanpui a ni.

Kum 2014-ah Rs. 442,00 hmuin, ACH Poor Fund tan an hlan a, kum 2015-ah Rs. 37,150 hmuin, ACH Poor Fund-ah bawk an hlan. Kum 2016-ah Rs. 45,000 an hmu a, ACH Dialysis room tihchangtlun an pe leh a ni.