Foreigner nia hriat man tumtu police-te Khojoysury-ah Chakma-te'n an lo dang
MZP sub-headquarters, Tlabung chuan thuchhuah siam, Tlabung aṭanga km. 27 vela hlá, New Khojoysury khuaah Bangladesh mi (foreigner) Lokhi Ranjon (Pulu) chu Tlabung police-in man an tum a, mahse, Lokhi Ranjon Chakma chu an sakhaw puithiamte'n an hum tlat avangin an man thei lo niin an tarlang.
Tlabung MZP tarlan danin, New Khojoysury khuaah hian Bangladesh mi dan loa awm a awm tih hriain, Tlabung Police Station-ah MZP-in FIR an thehlut a; FIR chu police-te'n bawhzuiin, Lokhi Ranjon chu man an tum a, mahse New Khojoysury mite leh Chakma puithiamte'n humin, an biak-inah an dah tlat a, police-te chuan an man thei rih lo a ni.
New Khojoysury khaw mite leh an sakhaw puitthiamte'n Chakma foreigner an chhan tlat chu hriatthiam har an tih thu Tlabung MZP chuan an tarlang a, "Chakma puithiamte'n kan police-te hna tur an lo dang hi dan leh thupek zah lohnaah kan ngai," an ti.
Tlabung MZP chuan, Lokhi Ranjon Chakma chu man thuai turin police an ngen a, amah lo chhana humtu puithiam Bindi Chakma pawh man thuai turin police an ngen nghal bawk.
Tlabung MZP president P Vanlallawma chuan, police-in Lokhi Chakma man an tumnaa New Khojoysury mite leh police inkara buaina awmah hian BSF-te'n thu chiang hre loin Chakma-te an lo páwng ṭan nghal ringawt a, Lunglei DC hnenah police-te chu an hêk niin a sawi.
Tlabung MZP President-in Vanglaini a hrilh danin, Lokhi Ranjon Chakma hi nimin thleng khan man a la ni lo a, nimin vek khan thil awm dan thlithlaiin Tlabunga YMA hruaitu ṭhenkhat chu New Khojoysury an kal a ni.
Hetih lai hian, Lunglei district-a police hotute chuan, New Khojoysury khuaa thil thleng hi police-te'n ngun takin an thlithlai reng a, boruak sosang a awm rih lo tih an sawi.