END-in lirthei khalhtute enfiah

Excise & Narcotics department (END) chuan thuchhuah siamin, Krismas leh kum thar vuakvetah mipuite’n thlamuang leh him taka hunpui an hman theih nan theihtawpin ṭan an la tih an tarlang a; hmun hrang hrangah khualzin phur lirthei khalhtute'n zu an in leh in loh an endik ṭhin thu an sawi.

END chuan, Krismas leh kum thar lo thleng turah mipui himna atan district khawpui hmun hrang hrangah duty post an siam belh tih an sawi a, "Passenger phur lirthei khalhtute zu an in nge in lo tih finfiahin breath alyser hmangin endik an ni a, zu in hnua lirthei khalh dappui thlak a ni," an ti.

Ruihhlo hman khawloh venna turin Krismas leh kum thar vuakvet atan Aizawl khawpui kawtchhuahah uluk takin an duty tih sawiin END chuan, Tuirial Airfield-ah leh Rangvamualahte beat post siamin, officer leh thawktu dangte'n an vil reng thu an tarlang.

END chuan, Krismas leh kum thar vuakvetah vantlang hmuna zu in lo tur te, zu in hnuah lirthei khalh lo tur leh, ruihhlo laka fihlim turin mipuite an beisei thu an sawi a; Kristiante hunpui chu hlim leh thlamuang taka mipuiin an hman tlan ṭheuh theih nan mi tinte duhsakna an hlan a ni.