Sainik School-ah hmeichhia luh theih dawn

India rama a hmasa ber ni turin Sainik School, Chhingchhipah academic session thar 2018-2019 aṭangin hmeichhiate tan admission a tih theih dawn. Sainik School, Chhingchhip hi India rama Sainik School 27-na a ni.

Governor Lt. Gen. Nirbhay chuan Sainik School-a hmeichhe naupangte luh a phal ta chu lawmawm a tih thu sawiin, "Hemi kawnga ṭhahnemngai taka sawrkar laipui lo dawr ṭhintu ka nih angin, hei hian Mizoramah hmasawn nan hmeichhia leh mipa inkarah inthliarna a awm lo tih a lantirin, hmeichhia leh mipa intluk tlanna leh hmeichhe dinhmun chawikan kawngah hma hruaitu kan ni a tilang chiang hleah ka ngai," a ti a; Krismas dawna hetiang thu lawmawm lo thleng hi Mizo mipuite tana Krismas thilpek hlu tak a nih thu a sawi.

Sainik School, Chhingchhip chuan class 6-a lut turin hmeichhe naupang tan admission a hawng mek a, prospectus-cum-Application form hi Sainik School Chhingchhip leh Directorate of School Education, Aizawl ah te December 20-30, 2017 chhungin a lak theih a, January Ni 7, 2018 hian entrance exam buatsaih a ni ang. Dilna hi ni 2.07.2006 leh 01.07.2008 inkara piangte tan thehluh theih a ni.