Dan loa Bangladesh aṭanga foreigner Mizorama lutte chungchang sawiho

Lunglei District Level Special Task Force Committee in Connection with Illegal Bangladeshi Migrants chu December 20, Nilaini khan Lunglei DC mawhphurhna la mektu, Benjamin Lalzama hoin a pisaah an ṭhukhawm a; dan loa Bangladesh aṭanga Mizorama lo lutte chungchang an sawiho.

Meeting-ah hian, dan loa Bangladesh aṭanga Mizorama lo lutte hmuh chhuah leh thawn let kawnga chak taka hmalak dan tur sawiho a ni a; BSF hotute pawhin hemi kawnga harsatna an tawh ṭhinte sawiin, hmachhawp hrang hrang an thlirho a ni. Birth certificate leh certificate dang pek chhuah chungchangah fimkhur a ṭul thu sawi lan a ni a, hmalak ṭul an tihte chu Home department-ah an thlen dawn a ni.

Meeting chuan, hma la turin Tlabung Sub-Division-ah SDO(C) kaihhruaina hnuaiah Sub-Division Level Special Task Force an din a, SDO(C), BDO, Commander MAP, VCP leh YMA, YCA-te member an ni ang.

Meeting-ah hian sorkar department hotute bakah, 1st Battalion BSF hotute leh YMA sub-headquarters, Lunglei hruaitute an tel a ni.