Khawbung - Tuipui kawng siam ṭha

Khawbung Branch YMA huaihawtin December 20, Nilaini khan Khawbung leh Tuipui kawng chu a chhiat nasat tawh avangin siam-ṭhat hnatlang koh a ni a, mi ṭhahnem tak an thawk chhuak.

Thu dawn danin, Khawbung leh Tuipui inkar kawng hi Champhai - North Vanlaiphai (CNV) road tia sawi huam chhung­a mi a ni a, siam a nih hnu kum 20 hnuah pawh siam ṭhat leh a la ni lo. Tuipuiral khaw tam zawk zin kawng a ni a, Tui­puiral tlangdunga hmun hlui leh hmun pawimawh tlawhtu khualzin tam tak kalna a ni.

Khualzinte tan chetsual palh leh lithei sawh chhiat mai hlauhawm khawpin kawngpui chu a chhiat tawh avangin Khawbung Branch YMA chuan kawng siam hna­tlang a ko a ni.

Khawbung branch YMA president H Lalni­liana chuan, sorkar emaw, department emaw dem vanga hnatlang an nih loh thu sawiin, "Khualzin tam takte nuamsa zawk leh him zawka an zin theih nan leh lirtheineitute tan kawng chhiain lirthei a zawh chhiat mai lohna atan kawng siam hnatlang hi koh a ni," a ti.

Hnatlangah hian mimal JCB pahnih, tipper pathum, pick-up pa­hnih leh lirthei dang eng emaw zat thawh chhuahpui a ni a; bialtu MLA T Sang­kunga'n hnatlangte'n a ṭul anga an hman atan Rs. 10,000 a thawh bawk.