KHAWTHLIR
Advance Christmas
Champhai MJA member-te leh IPR department-a thawkte chuan nimin khan IPR pisaah Advance Christmas leh MJA member thar lawmna hun an hmang. Champhai district MJA-te hian Champhaia home hrang hrang bakah, District Hospital-ah ṭanpuina an hlan nghal a ni.
Police beat post
Mizoram police-te chuan Krismas leh kum thar lawmna vuakveta mipui him zawk nan Rangvamualah temporary beat post an siam thar a, nimin khan Aizawl SP Neihchungnunga'n a hawng. Police thuchhuah chuan, emergency leh buaina nei tan mobile phone no. 7461039431-ah engtik lai pawha biak theih a nih thu a tarlang.
Krismas thilpek
Central YMA chuan Aizawl leh a chhehvela home leh damdawi-in hrang hrangah Krismas thilpek an hlan. CYMA-in Krismas thilpek a hlante hi a vaiin Rs. 1,49,000 a ni a, home/ centre leh damdawi-in 28-ah an sem a ni.
Ruihhlo phal lo
Republic Veng VDP chuan thuchhuah siamin, Krismas leh kum thar vuakvetah ngawrh takin an duty dawn tih an tarlang a; Republic Veng chhungah ruih theih thil reng reng lak luh phal a ni lo tih an puang. Republic Veng VDP-te chuan, an veng chhung hmun ualau laiah leh thlanmualah zu in leh ruihhlo tih phal a nih loh thu te, kum tling lo leh danin a phal ang bak lirthei khalh phal a nih loh thute an tarlang bawk.
NLUP sem
AH&Vety department chuan nimin khan Darlawnah NLUP hnuaiah chhungkaw 33 hnenah vawkte an sem a, vawk note 82 sem chhuah a ni. Vawk note semte hi Darlawn khaw chhung aṭanga lei vek a ni.
Tlan theih
Traffic SP C. Lalthanmawia chuan thupek chhuahin, Krismas Ni, December 25 leh Kumthar Ni, January 1 chu ni pawimawh leh hun pawimawh bik a nih avangin, Co-ordination Committee on Traffic Managment thurel anga lirthei number tawp ber number ang ni zela tlan theih loh thupek chhuahin a huam loh thu a tarlang a, "Hemi ni hi chuan lirthei number eng pawh tlan theih a ni," a ti.
Thawhpuiah sáwm
Mara Autonomous District Council (MADC)-a executive member (IPR) K Chhuabei chuan Nilaini khan a pisaah thuthar thehdarhtute a kâwm a, mipui thlan sorkar nena lungrual taka thawhpuiah a sáwm. Inkawmnaah hian NEDP hnuaia press study tour-a kal Siaha thuthar thehdarhtute'n an thil hmuh leh zir chhuahte an sawi a ni.
Mi 1,214 admit
November 2017 chhung khan Aizawl Civil Hospital-ah mi 30,584 an inentir a, mi 1,214 dah luh an ni. Nau piang 382 an awm laiin, mitthi 38 an awm a; mi zai 1,456, x-ray-a en 2,010, laboratory-a en 60,396 awmin, Mizoram pawna inenkawl tura refer mi 6,597 an awm bawk.
NLUP sum sawifiah an phût
PRISM party chuan thuchhuah siamin, NLUP sum zatve vel awmna leh hman dan chipchiar sawifiah turin Mizoram sorkar an phût. PRISM chuan, NLUP atan cheng vbc. 2,800 hman tawh nia sawi a nih laiin, NLUP dawngtu chhungkaw 1,31,521-te'n Rs. 1,00,000 ṭheuh dawng pawh ni se, mipui hnena sum pek chu cheng vbc. 1,300 vel tihna a nih thu an tarlang a, "Mipui kuta lut bak hi cheng vbc. 1,400 vel a awm thei niin a lang a, heng sum hi khawiah nge a awm tih mipui min hrilh hi sorkar bat a ni," an ti.
Ngaubuang kah pawi an ti
Dampa Group YMA chuan thuchhuah siamin, Chhippui Kawnmawi khaw mi pathumte Dampa Tiger Reserve chhungah luta December 17, 2017-a Ngaubuang an kâp chu pawi an tih thu leh an ui thu an tarlang a; Ngaubuang kâptute man an nih chu lawmawm an tih thu an sawi. Dampa Group YMA tarlan danin, Dampa Tiger Reserve chhunga Ngaubuang kaptute chu Rualsailova (36) s/o V Lalramthara (L), Lalrinawma (26) s/o Deri leh Noela (20) s/o Kumara, Chhippui Kawnmawi khua vekte an ni. Mi pathumte hi an phû tâwk hremna pe ngei turin sorkar an ngen a ni.