KHAWTHLIR

Kolasib DC Dr H Lal­thlangliana chuan thupek chhuahin, Tamil Nadu leh Puducherry aṭanga Mizo tangkhang rawn hawte'n naktuk Zirtawp­ni hian Bairabi an rawn thlen beisei a nih thu a tarlang a, "Sorkarin an district headquarters-ah ṭheuh a thlah dawn avang­in mimal motor-a inlam phal a ni lo a, inhmuah pawh khap a ni," a ti.

Aizawl Civil Hospital (ACH), AVBD leh NSS office ruahman angin nimin khan Hrangbana College, MICE leh Zemabawk HSS-a NSS unit-te'n ACH blood bank-ah thisen unit 35 an pe a, petute mipa 28 leh hmeichhia pasarih an ni. Individual donor mi pahnih an awm bawk.

Ngopa-a Assam Rifle-te chuan nimin khan Covid-19 laka invenna atan Khawkawn, Ngopa leh a chhehvela task force duty-na hmun leh Tuivai leite disinfectants hmangin an phuhfai.

Mizorama zirlai pawl hrang hrang - Mizo Zirlai Pawl, Mizo Students Union, Students' Self-Support Union leh National Students' Union of India te chuan HSLC 2020 result chhuak chungchangah a hrang ṭheuhin thuchhuah an siam. Result chhuak avangin lawmawm an tih thu te, MBSE-a thawkte fakawm an tih thu te, zirlai pass-te an lawmpui thu te, an zir zelna turah duhsakna an hlan thu te, pass lote an tawrhpui thute leh beidawng loa zir zel tura an duh thute an tarlang a ni.

Directorate of Science & Technology hnuai­a Mizoram Science, Technology & Innovation Council (MISTIC)-in Mizoram Secretariat kawta kut hmang loa ke chauh hmanga tui herh haw leh herh tawp theihna hmanrua an siam chu May 12, Thawhlehni khan hawn a ni. Khawl hi pisaa thawktute leh dawrtute'n awlsam zawka kut an sil theihna tura siam a ni.

May 13, 2020 chhuak Vang­lainia chief minister Zoramthanga thusawia Supply atan Covid-19 vanga cheng nuai 24.56 hman a ni tih chu cheng vbc. 24.56 tih zawk tur a ni.