CM-in Mizo zawng zawngte Krismas duhsakna a hlân

Chief minister Lal Thanhawla chuan Krismas thuchah a tichhuak a; Mizo zawng zawngte Krismas chibai bûkin, hlim leh lawm taka hmang vek turin duhsakna a hlân.

CM Lal Thanhawla chuan, Isua Krista chu lalte lal, pathiante Pathian a ni tih sawiin, a pian tur thu pawh kum tam tak hma lamah puan lâwk a nih thu a sawi a, "Hetiang ang hi lal dang leh pathian dang an awm ve lo. A thih hnuah pawh a ram a la zau zel a, a ramin kin ni a nei dawn lo a ni," a ti.

Lal Thanhawla chuan, Mizo mipuite chu Krismas hun lawm­awmah an thinlungte a lama hawn tura sáwmin, "Isu, vawiinah hian kan thinlung bawi-inah lo piang thar leh la, nang ka chatuan lal turin, tih hi kan kumtluan thupui lo ni se," a ti a; "Pathian chungnung ber, hnehchhiahte riangvaite ṭhian kan nei hi a lawmawm tak zet a ni," tiin, Isua lo piang tur chu a awm tleitu leh ṭhiana siamtu ni vek turin Mizo mipuite a sâwm a ni.

Isua Krista chu a lo kal leh ngei dawn tih sawiin CM Hawla chuan, "Ropui takin a lo kal leh ngei dawn a, chu chu hnam tin chi tinte'n an la hmu dawn a, khûp tinrengte a hmaah an la ṭhingṭhi dawn a. Chutih hunah chuan a thlan zingah kan tel theih nan he Krismas-ah hian inngaihtuah thar ila, kum tharah pawh a lam i hawi ang u," a ti.

Chief Minister chuan, kum thar lo thleng tur pawh kum dang zawng aia Pathian malsawmna an dawn kum a nih theih nan mipuite duhsakna a hlân a, "He hun lawmawhah hian kan thinlungte a lamah hawng ila. Ani tluka pawimawh he khawvelah hian an awm lo. Hun ṭha, hun lawmawm kan neih theihna turin kan inpuahchah tur a ni," tiin, ni tina Amah lenpuitu ni tura inbuatsaih vek turin Mizo mipuite a chah.

CM Lal Thanhawla chuan, "Ka ringtupui zawng zawngte leh Zo hnahthlak hmun hrang hranga awmte in zavaiin Krismas chibai ka bûk a che u," tiin, Krismas duhsakna a hlân a ni.