Chief Minister-in Mizoram mamawhte tarlanna Memorandum Prime Minister hnenah a hlan

Mizoram sorkar chuan thuchhuah siamin, December 16, 2017-a prime minister Narendra Modi-in Mizoram a rawn tlawh ṭum khan chief minister Lal Thanhawla chuan Mizoram leh hmarchhak bial tana pawimawh zualte tarlanna memorandum a lo pek thu a tarlang.

Ramchhung bung hrang hrangte hmasawnna kawnga an inthlau lutuk tur siamṭhatna policy tam zawkte a lo hlawhtling tawh lo tih sawiin CM Hawla chuan, "A bikin hmarchhak bial tan phei chuan hmasawnna kawnga state dangte umphak turin sorkar policy tam zawkte chuan awmzia a neih lo. Hmarchhak bial tih hmasawnna atana din North Eastern Council (NEC) ngaihthah a ni hi a ṭha lo," a ti a, sorkar laipui chuan hmarchhak bial tihhmasawn a tum tak tak a nih chuan NEC hman tur sum tam zawk a ruahman a ngaih thu a sawi.

Chief Minister chuan mi zawng zawng tana hmasawnna tura thawhho policy 'Participation for All and Development for All (Sabka Saath, Sabka Vikas) Mizoram mipuiin an thlawp tih tarlangin, ""He policy hlawh­tlinna atan hian state sorkarte chu thuneihna sang zawk nise. Tualchhung mamawh leh

ṭangkaipui tur chu state-in an hrechiang zawk a ni," a ti.

Lal Thanhawla chuan hmasawnna ruhrel din kawngah Mizoram chu state tenau leh mihring tlemna a nih avangin mimal sumdawng liante an rawn lut ṭha duh lo tih tarlangin, "Sorkar laipuiin private investor-te Mizoram leh hmarchhak biala an rawn luh theih nan financial policy siamin remchanna sumdawngte tan siam se a sawt a rinawm," a ti a, cheng vbc. 22 senga Champhai Zotlanga din tur Truck Terminal leh Warehouse leh Sairanga din tur football academy te chu sorkar laipuiin a tihhlawhtlin thuai a beisei zinga mi a nih thu a sawi.

Internet Connectivity chu hna tinreng thawhna a nih avanga ngaihven hmanhmawh a ṭhat thu Prime Minister hi hrilhin Chief Minister chuan, "Sorkar laipuiin Digital India programme hnuaia Broadband to All leh Optical Fibre Network to Every Village kalpui a tum chu thil lawmawm tak a ni. Mizoram chhungah heng hmalakna puitlin tur hian cheng vbc. 300 chiah a ngaih a vangin sorkar laipui tan thil tih awlsam tak nih a rinawm.He hnathawhnaah hian State department-te thawhpui ni se kan duh a ni," a ti.

Lal Thanhawla chuan Mizo­ramah kawlphetha lui tuikhuah hmangin Mw. 4300 leh nizung hmangin Mw. 6090 siam theihna tur hmunhma a awm tih sawiin, "Ministry of New and Renewable Energy(MNRE) ṭanpuina in Tuirini 24mw Hydel Project chu cheng vbc. 465.00 senga siam tum a nih laiin, MNRE hnuaia

ṭanpuina erawh sorkar laipuiin state tan kawlphetha siam theih zat Mw. 3 aṭanga Mw. 25 MW a tih pun hnu pawn cheng vbc. 20 chiah a la ni reng a ni," a ti a, sum lam a harsa Mizoram state ang tan chuan hnathawh a harsat thu a sawi.

Mizorama khawpui pakhat leh khawpui tenau 22 te sorkar laipui beisei anga nitin tui hnianghnar taka pe turin cheng vbc. 250 leh Mizorama thingtlang khua 738 a tui hnianghnar taka pe vek turin cheng vbc.1400 mamawh a nih thu Chief Minister chuan sawiin, "National Rural Drinking Water Programme (NRDWP) kal tlangin kum tin cheng vbc. 20 chiah hmuh ṭhin a ni a, ṭanpuina sum hi lian tham zawka rawn pek a nih loh chuan Mizoram chhunga cheng ten tui in tur hnianghnar tak dawng turin kum 70 an nghah a ngai dawn a ni," a ti.

CM Hawla chuan Mizoram kawngpui chu bungua leh inkalpawhna ruhrel lian ber a ni tih sawiin, "Mizoram chhungah km. 100 bialah kawngpui km. 36.19 chiah awmin India ram pum huap tehna km. 100 bial chhunga kawngpui km. 166 a sei nen a inthlau nasa hle. Mizoram chhunga kawngpui km. 7632 a thui enkawlna senso chu km. 1 ah cheng nuai 6.45 zela chhutin kumkhatah cheng vbc. 300 zet a ni," a ti a, km. 100 bial chhunga kawngpui km. 166 a sei Mizoram chhungah kawng siam ve a nih theih nan Prime Minister chu hma la turin a ngen a ni.