Kuminah ruihhlo vangin mi 60 thi tawh

Kumin January aṭanga December 14 thleng khan Mizoramah ruihhlo vangin mi 60 an thi tawh niin Excise & Narcotics department (END) chuan an chhinchhiah.

END chhinchhiah danin, kumin chhunga ruihhlo vanga thi mi 60 zinga 49 chu mipa an ni a, mi 11 chu hmeichhia an ni. Ruihhlo vanga thite'n an thihpui tam ber chu heroin a ni a, heroin vanga thi hi 28 an awm a, damdawi dang hman sual vanga thi mi 32 an awm bawk.

Excise & Narcotics chhinchhiah danin, kum 1984 aṭangin damdawi hman sual vangin Mizoramah thi an awm ṭan a, kum 1984 aṭanga tun hnai thlenga thi an chhinchhiah tawh zat chu mi 1,462 an ni. Mi 1,462 zinga 1,300 chu mipa an ni a, 162 chu hmeichhia an ni.

Kumin January aṭanga October thla thlengin END chuan heroin kg. 5.2, ganja kg. 379 leh gram 943, methamphetamine mûm 13,400 an man tawh a; ruihhlo kaihhnawiha an mi mante zinga 429 chu NDPS Act 1985 hnuaiah thubuai siamsak an ni.