KHAWTHLIR

Christmas Parade
Vawiin hian Post Event Management huaihawtin Aizawlah Christmas Parade huaihawt a ni dawn a, a duh apiang tel turin an sawm. Christmas Parade hi chhun dar 12-ah Chanmari kâwnah ṭan tur a ni a, rimawi nen kawng zawh a ni ang a, zaithiamte an zai dawn a ni.

Solomona Temple
Kohhran Thianghlim biak-in pui ber, Solomona Temple chu December 25, Thawhṭanni khian hawn a ni dawn. Solomona Temple hi kum 23 chhung sak a ni a, Kohhran Thianghlim hotupa Dr LB Sailo-in hawngin, thuchah a sawi dawn a ni.

Street Concert
Mission Veng Branch KTP chuan nizan khan Sikulpuikawnah Street Concert an huaihawt. Concert hi zan lama khawlai leng velte hnena Pathian thu hrilna hmanrua atana huaihawt a ni a; Pathian thu puan chhuah a nih bakah, Mizorama zaithiam larte leh Mission Veng chhunga zaithiamte an zai a ni.

Minister-in enfiah
AH & Vety minister C Ngunlianchunga chuan, tun hnai khan Mampuia AH & Vety farm a tlawh a, RKVY sum hmanga vawk inthlah punna, Pig Multiplication Farm-a vawk in sak thar pali a enfiah a, vawk-in paliah hian vawk note 102 a awm a ni.

YLA in hawng
Sangau-a BADP sum cheng nuai 10 senga sak Young Lai Association Sub Hqrs. Office building thar chu nimin Lai Autonomous District Council EM C Lallungmuana'n a hawng. C Lallungmuana chuan YLA-te chu midangte ṭanpuina tura inpekna thar nena an pisa chu hmang tura fuihin, char paruk leh steel almirah pakhat a pe.

Krismas thilpek
Aizawl South-III bialtu MLA KS Thanga chuan Krismas thilpek atan a bial chhunga awm Refferal Hospital, Falkawn hnenah Rs. 50,000, TB Hospital, Falkawn hnenah Rs. 10,000, Aibawl leh Sialsuk damdawi-in hnenah Rs. 10,000 leh Drop-in-Centre, Melriat hnenah Rs. 5000 a hlan.