Sorkar leh pawl hruaitu inhmukhawm - Inkhàrkhip zui zel a ni dawn Inthlahdul an ngaimawh tlâng
Nimin khan chief minister Zoramthanga hoa Assembly Annexe conference hall-a sorkar hotute leh pawl hrang hrang aiawhte ṭhukhawm chuan, inkhàrkhip (lockdown) kal mek a tawp hnuah pawh inkhàrkhip zui zel ṭha an ti. Meeting-a thu sawitu tam zawk chuan, kan inthlahdul lutuk deuha an hriat thu leh an ngaimawh thu an sawi.
Meeting-ah hian Assembly speaker Lalrinliana Sailo, minister, official-te bakah political party, All NGO Coordination Committee, Mizoram Kohhran Hruaitute Committee, Mizoram Journalist Association, Mizoram Govt. Doctor Association leh Indian Medical Association (Mizoram Branch) hruaitute an tel.
Chief Minister chuan, Covid-19 donaa pawl, kohhran leh mimal inpeknaah lawmthu a sawi a, "YMA-te'n thil dang pawh buaipui hman loa ramri an veng tlatte hi a lawmawm tak zet a ni. Kan thawhhona hian rah ṭha a chhuah ngei ka beisei," a ti.
Meeting-a rêl a nih dan chuan, inkhârkhip thawh thumna kal mek a zawh huna inkharkhip chhunzawm dan tur, kalphung leh a hun chhung turte chu Chief Secretary kaihhruai State Executive Committee-in an ruahman ang. Inkharkhip thawh thumna kal mek hi May 17, Pathiannia tàwp tur a ni.
Thu dawn danin, meeting-a tel zingah inkhàrkhip pawhsei duh lo an awm lo a, sawitu tam zawk chuan Mizoram chu a inthlahdul mah maha an hriat thu an sawi hlawm. Ṭhenkhat chuan mipui dinhmun ngaihtuahin tuna kan kal dan chu ṭha thawkhatah an ngai thung.
Medical lam aiawhte chuan in (home) dinhmunin a zir chuan, home quarantine chu quarantine centre pangngai aiin a him zawk theia an hriat thu an sawi.