Pastor hriat hlawh VL Zaithanga a thi

Mizo pastor zinga langsar tak, Rev. VL Zaithanga (86) h/o Zoparmawii chu nimin zing dar 6:30 vel khan Diphu, Karbi Anglong, Assam-ah a thi a, nimin vek khan Diphu-ah vui a ni.

VL Zaithanga hi March 24, 1934-ah Sialhâwk khuaah a piang a, a hminga VL tih hi Vanlalsiama Lahore tihna a ni a; kum 1933-34 vela India ram hmar lam khawpui hrang hranga zaia rawngbawla zin chhuak Lahore Zaipawl (Mizo Zaipawl an tih bawk)-ah a pa Vanlalsiama a tel ve vanga phuah a ni.

Kum 1957-a B.A a zawh hnua sorkar hnate a thawh hnuah kum 1961-64 chhung United Theological College (UTC), Bangalore-ah B.D. a zir a, Mizo zinga UTC-a B.D zir hmasa ber a ni. Kum 1966-ah Synod Mission Board (SMB) secretary hna a thawk ṭan a, kum 1967-ah probationary pastor atan lak a ni a, SMB-a thawk lai a nih avangin pro.pastor hna kum khat chauh a thawk a, kum 1979 tawp lama pastor atan nemngheh a ni.

Mizoram Synod-ah moderator, secretary, statistician, executive secretary, treasurer/finance officer-te a ni tawh a, Presbyterian Church of India-ah secretary leh treasurer leh North East India Christian Council-ah treasurer a ni tawh. Central KṬP-ah leader, assistant secretary leh treasurer, Kristian Tlangau editor, Mizo Gospel Team (zaipawl)-ah team leader-te a ni tawh bawk.

Rev. VL Zaithanga hi Mizoram Synod aṭangin kum 1996-a a pension hnuah para-church lamah a inhmang zui a, kum 2008-2012 chhung PCI-in ruai lehin, Diphu-ah PCI Assembly officer hna a thawk a; chumi aṭanga a chawlh hnuah Madhya Pradesh/Maharashtra velah rawngbawlin a kal chhuak leh bawk.