Endik thar mi 49-in Covid-19 an vei lo

Zoram Medical College (ZMC)-a Covid-19 Testing Laboratory-ah Nilaini leh nimin khan mi 49-te swab sample endik a ni a, Covid-19 an vei lo vek tih hmuh a ni. Niminah Covid-19 kai rinhlelh thila State Referral Hospital (SRH)-a dah luh thar an awm lo.

SRH-ZMC Covid-19 Bulletin nimin tlaia tih­chhuahin a tarlan danin, Nilaini leh nimina sample endik zingah hian Rapid Antibody Test (RAT) hmanga enfiahnaa rinhlelh kai (reactive) an tel nual. ZMC Covid-19 laboratory-ah sample dawn belh zel a ni tih tarlangin, "Test hi tihsual a hlauhawm avangin thawktute'n uluk takin an buaipui ṭhin," a ti. 

SRH-ah hian hripui kai rinhlelh ni lêm lo, phai aṭanga damlo rawn hawte enkawl tel an ni ṭhin a; chu'ng zingah chuan cancer damlo pahnih pawh an tel. Nimin khan damlo dah luh thar an awm lo a; chutih rualin, damlo 12 awm mekin, Risk Ward-ah pahnih, Make Shift ICU Ward-ah mi pakhat leh Holding Ward-ah mi pakua an awm.

Nimin bikah tlai dar 5 thlengin Mizoram luhkaa screening point hrang hrangah mi 591 enfiah an ni a; quarantine centre-a dah luh mi 38, home quarantine-a dah mi pasarih, RAT hmanga enfiah mi 305, RT-PCR test mi pathum an awm bawk.

Covid-19 chung­changah hian Mizoram sorkar chuan helpline a siam a, hripui kaih­hnawiha harsatna neite tan phone no. 102 (toll free), 0389 2323336, 0389 2318336-ahte biak theih a ni.