Lei let thei lote sorkarin a lehsak dawn - Agriculture Minister

Agriculture minister C Lalrinsanga chuan, leilet nei, hnam dang an chhawrte'n hripui vanga an hawsan vanga lei let thei lote chu Mizoram sorkarin a lehsak dawn tih a sawi.

Minister C Lalrinsanga hian nimin khan Covid-19 inkhàrkhip vanga Kolasib district-a loneitute harsatna a enpui a, Bilkhawthlir SDAO hmunhma thawmṭhat ngaite leh Agriculture Rest House sak ṭhat dan turte a en nghal a ni.

C Lalrinsanga chuan, lei lettute'n a thlàwna an hman tur Bilkhawthlira custom hiring centre (CHC)-ah tractor panga a vailiam a, "CHC hi leileta khâwl hmanga hna thawk turin páwl hnena hlan a ni a, mimal ta tur a ni lo," a ti a; centre enkawltute leh leilet neitute'n ṭangkai taka an hman theihna tura duan a nih thu leh a nihna tura hmang lote chu chhuh leh theih a nih thu a sawi. 

Agriculture Minister chuan, "Leilet nei, hripui vanga hnam dang an chhawrte'n an hawsan vanga lei let thei lote sorkarin lei a lehsak dawn a. Leilet zau ṭha tak tak neitute pawhin mahni leileta hlâwkna téltu nih tuma ṭan an lak a ngai," a ti a; Agriculture department hnuaia Research and Development kaltlangin thlai chîa Mizoram a intodelh theih nan ngawrh taka hmalak a nih thu a sawi bawk.

Kolasib district-a leileta Covid-19 vanga harsatna thlengte enfiah turin May 13-15 chhung khan Agriculture Minis­ter leh Agriculture Development Board member-te chuan Kolasib, Bilkhawthlir, Bairabi leh Bûkpui-te an tlawh. Inkharkhip vanga lei lehna tur bâwng leh kháwl nei lo te, leilet enkawltu vai nei lote an awm a, chu chuan buh chìn kawng­ah harsatna a thlen a ni. Harsatna tâwk mek ram hactare 151-a zau leilet nei chhungkaw 123 vel an awm mek.

C Lalrinsanga hian Bairabi North leh South task force-te hnenah Rs. 5,000 ve ve a pe a; Bai­rabi Zophai leh Mamit district-a Saikhawthlir leh Suarhliap-te tlawhin, loneitute nen an inkâwm bawk a ni.