Cabinet minister-ah Lalrinawma lakluh a ni ; Rinliana, Chhandama & Ruatkima Cabinet Minister-ah kaisantir

Governor Dr Hari Babu Kambhambati chuan nimin khan Mizoram minister (cabinet minister) atan mi pali a la lut a, Raj Bhavan circular lawn-a lâk luhna inkhawmah rinawmna thu a tiamtir. Nimin vêk khan minister-te hna chanpual tur tihchhuah nghal a ni.

Minister lak luhna inkhawm hi chief secretary Dr Renu Sharma-i'n a kaihruai a; mi pali - K Lalrinliana, Lalchhandama Ralte, Lalruatkima leh Lalrinawma te chu a mal tê têin rinawmna thu a tiamtir a ni.

Cabinet minister atana lak luh thar zinga pathum - K Lalrinliana (Kolasib bialtu), Lalchhandama Ralte (Tuivawl bialtu) leh Lalruatkima (Aizawl West-II bialtu)-te chu minister of state ṭang lai an ni a; pakhat dang, Tuikum bialtu MLA Lalrinawma chu Assembly deputy speaker aṭanga tun hnaia báng ta a ni.

Minister lak luhnaah hian minister te, MLA te, sorkar official-te leh sorkar lai MNF party hruaitute an tel a; minister ni mek zingah Dr R Lalthangliana, R Lalzirliana leh Robert Romawia Royte-te an tel lo.

Minister lak luh inkhawm hman zawha Vanglaini palaiin sorkar term tàwp dawn tawh lama a cabinet a tihdanglamna chhan zawhna chhángin chief minister Zoramthanga chuan, "A mamawh atin a nia," tiin a chhang a; portfolio chu a tihdanglam dawn loh thu a sawi.

Cabinet minister atan mi pali lak luh thar an nih tak avangin chief secretary chuan nimin khan Mizoram Gazette hmangin hriattirna a tichhuak a, minister-te hna chanpual, department an enkawl turte a tarlang.

Minister-te hna chanpual hi tihdanglam a awm lo a, minister ni sate chuan department an enkawl lai ṭheuh an enkawl dawn. Minister atana lâk luh thar Lalrinawma chuan minister of state aṭanga báng ta Dr K Beichhua enkawl ṭhin department pali a enkawl zui dawn a ni.