Larsapin Krismas leh kumthar pualin Mizoram mipui duhsakna a hlân

Governor Hari Babu Kambhampati chuan nimin khan Krismas thuchah a tichhuak a, Krismas leh kumthar hlim leh lâwm taka hmang turin Mizoram mipui duhsakna a hlân.

Dr Hari Babu Kambhampati chuan, remna leh muanna chu thupui bera neih a duh thu sawiin, "Krismas hi Lal Isua pianna hlim leh lawm taka kan hman hun a ni a, he hun pawimawh tak, lei leh van inremna ní-ah hian remna leh muanna kan thupui ber ni se. Remna hi tunlai khawvel in nghirnghona leh buaina kara kan mamawh ber a ni," a ti.

Hmun tam takah mi dangte rem hlei thei loa inlâk hran tumna a thleng mek tih sawiin Larsap chuan, "Lal Isua’n min zirtir angin inpumkhatna leh inunaunate vawn nun tlat kan tum tur a ni. India ram inpumkhatna atan mi chi hrang hrangte zái khata luanho tih kan thupui ni reng ṭhin hi Mizorama chêng hnam péng hrang hrang leh sakhaw hrang hrang vuantute tan kan inpumkhatna tura pawimawh em em a ni," a ti a; sakhuana emaw, thil dang emaw vanga danglam deuhnate dahṭhain, remna leh muanna a awm theih nan theihtawp chhuah turin mipui a chah.

Hari Babu Kambhampati chuan, Mizoram chu ram mawi bik, sik leh sa nuam leh boruak thianghlim tak nei a nih thu sawiin, "Mizorama ka thil hmuh tawh aṭangin Mizo mipui an hawihháwm a, an inlungrual hle a, a lawmawm hle. Tun aia kan ṭan mar lehzual chuan kan theihna sang tak hian hlawhtlinna lian zawk min thlen dawn a ni," a ti.

Governor chuan, sorkar laipuiin hmasawnna atana hmalakna hrang hrang a kalpui chu ngaihven thar tur leh ṭangkai taka hman tum turin mipui a chah a; Kristmas-ah hian hripui léng vanga mi harsa zawkte theihnghilh lo tur leh ṭanpui tur te, kum tharah ram intodelh, ram hausa leh India thar siam tura hma lam pana ke pên zel turin mipui a sáwm bawk.