Social media hmanga dan bawhchhiatna thubuai 164 ziak lut tawh, mi 23 man an ni

Mizoramah kum 2020 aṭanga kumin October thla thleng khan social media hmanga inbumna leh dan bawhchhiatna thubuai 164 ziah luh a ni. Cyber crime kaihhnawih dan bawhchhia mipa 23 leh hmeichhia 12 lakah thubuai ziah luh tawh niin, Mizo 21 leh hnam dang pahnih man an ni tawh.

Mizoram Police hnuaia CID Crime (Criminal Investigation Department)-in RTI Act hmanga zawhna an chhan danin, kum 2020-ah Cyber Crime Police Station kalpui ṭan a ni a; Cyber Crime PS chuan kumin October thla thleng khan Mizoramah social media hrang hrang kaltlanga inbumna leh dan bawhchhiatna 164 an dawng tawh a ni.

Thubuai ziah luh 164 zingah hian sum lam kaihhnawih (financial fraud) tam berin, thubuai 102 a awm a; mipat hmeichhiatna lam kaihhnawih (sexual harassment) thubuai 23, nihna inruksak (identity theft) thubuai 21, child pornography (mipat hmeichhiatna thila naupang kaihhnawih) thubuai pasarih, thu dik lo thehdarh (false rumour) thubuai paruk leh, social media kaltlanga indiriamna (harassment) thubuai panga a awm bawk.

Cyber dan bawhchhiatna thubuai ziah luh zat chu kum 2020-ah 10, kum 2021-ah 22 leh kumin 2022-ah October thla thlengin 132 a ni a; social media hrang hrang zingah Facebook kaltlanga dan bawhchhiatna a tam ber tih an tarlang. Cyber Crime PS chuan thubuai 40 chhui zawh tawh a ni a, chhui mek 146 an nei a ni.

CID (Crime) hotute chuan, social media hmanga dan bawhchhiatna hrang hrangah Mizo 21 leh hnam dang pahnih man an nih tawh thu an tarlang. Dan bawhchhetu mipa 23 leh hmeichhia 12 lakah thubuai an ziak lut a, court-in mipa pasarih leh hmeichhia pakhat a hrem tawh. Dan bawhchhetute chu kum 16-45 inkar an ni.

Dan bawhchhiate chhui zui chungchanga harsatna an neih leh neih loh zawhna chu, 'Service provider leh bank lam aṭangin kan mamawh chhanna kan dawng har ṭhin' tiin an chháng a; hmanrua an neih ṭhat avangin thubuai chhui zui theih loh an neih loh thu an tarlang.

Mizoram Police chuan an Instagram account-ah digital apps hmanga hun rei lote chhunga loan rulh tur, pung tam tak nei thei zuarte chu dan loa thil ti an nih thu an tarlang a, "Personal data leh mimal thil pawimawhte laksak hmangin vauna nena sum phût lêt ṭhin a ni. Hetiang thila inbumna hria kan awm a nih chuan Cyber Helpline number 1930 emaw, Cyber Crime portal cybercrime.gov.in ah rang taka report turin kan inhriattir a ni," an ti.