Two wheeler taxi tlàn loh ni tipung lo tur leh permit pe tawh lo turin sorkar ngen

Aizawl Two Wheeler Taxi Association (ATTA) chuan thuchhuah siamin, January 3, 2023 aṭanga chawlhkar khata ni hnih an tlàn theih lohna tura ruahmanna siam chu sût turin Mizoram sorkar an ngen a; traffic jam a zual zel loh nan two wheeler taxi permit pek belh tawh lo turin an ngen bawk.

ATTA chuan, sorkar ruahmanna angin tun dinhmunah chawlhkar khatah tlàn loh ní ni khat an neih mek thu an tarlang a, "Chhungkua kan châwm mek a, hetih lai hian, sorkarin kan eizawn theihna hun titlem záwnga hma lain, kum thar aṭangin kar khatah ni hnih tlân lo turin ruahmanna min siamsak a ni. Hnathawh theih ní titlem leh zual zawnga ruahmanna min siamsak hi ṭha kan ti lo hle a ni," an ti.

An sumdawnna lirtheite chu chhungkaw châwm nan neih thinglungkháwnga an neih a nih thu tarlangin ATTA chuan, "A ṭhente phei chuan pûk chawpa kan leite a ni hlawm. Hetih laia sumdawnna lirthei zinga tlân tlem ber kan ni hi hriatthiam har kan ti hle a ni," an ti a; sorkar ruahmanna thar ang chuan mimal lirthei aiin two wheeler taxi-te an tlàn tlêm tawh zawk dawn thu an tarlang.

ATTA chuan, traffic jam tihziaawm nan sorkarin two wheeler taxi a ruahman tih tarlangin, "Amaherawhchu, khawpui dâwl zawh tâwk bak permit pek a nih avang leh a tàwpah traffic jam thlentu tia two wheeler taxi-a eizawngte harsatna thlen zawnga min intlàn chhâwktir leh si hi hriatthiam har kan ti a, sorkar hian ruahmanna thar awm mek hi ennawn a, sût leh ngei se kan duh a ni," an ti a; traffic jam a zual zel loh nan two
wheeler taxi permit pek belh tawh lo turin thuneitu an ngen bawk.

Traffic SP Rodingliana Chawngthu chuan tun hnai khan hriattirna tichhuakin, January 3, 2023 aṭangin Aizawla two wheeler taxi-te tlân dan tur a tichhuak a; two wheeler taxi-te chu group pathum - A, B leh C-ah ṭhenin, ni khatah group pahnih an tlân ang a, group pakhat an châwl zel dawn a ni.

Two wheeler taxi intlân chhâwk chu zing dar 9:30 aṭanga tlai dar 5 inkarah a ni dawn a; Inrinni bikah chawhnu dar 1 aṭangin an vaia tlân phal a nih dawn bakah, Pathianni leh sorkar pisa chawlh ní-ah an vaia tlân phalsak an ni. Taxi-te chu sticker siamsak a ni dawn a, sticker chu vawiin aṭangin Traffic Control Room-ah lak theih
a ni ang.