Bamboo link road atan tender chhuah ṭêp

Chief minister Zoram­thanga ngenna anga Mizorama bamboo link road sialna atana sorkar laipui budget-a cheng vbc. 100 dah hmangin kawng siam turin hna thawh ṭan ṭêp a ni a, tender chhuah a ni ṭêp tawh.

Vanglaini palai zawhna chhangin advi­­ser to chief minis­ter (Technical) K Lal­sawm­vela chuan, bamboo link road a taka kalpui tura buaipui ngaite an buaipui zawh tawh thu a sawi a, "Tunah hian tender tura hmalak mek a ni a, tender theih thuai a ni ang," a ti.

K Lalsawmvela sawi danin, bamboo link road atan hian guideline an dawng lawk lo a, an dawn veleh tih tur ṭul leh pawimawh tarlante buaipui nghal char char a ni a, central lamah theh thlak a ni. Central-in an pawm hnuah tender theih a ni tawh.

Tarlan tawh dangin, kum 2022-23 union budget-ah hmarchhak state-te tan Prime Minister’s Development Initiative for Northeast (PM-DevINE) hnuaiah cheng vbc. 1,500 dah a ni a, chuta ṭang chuan Mizoram tan bamboo link road siamna turin cheng vbc. 100 leh Aizawl tlak lama Aizawl by-pass road siamna turin cheng vbc. 500 dah a ni.

Tarlan tawh ṭhin angin, Chief Minister hian Mizoramin bamboo link road a mamawh thu sorkar laipui hotu - Prime Minister leh Finance Minister bakah, minister dangte leh official-te hnenah ṭum eng emaw zat a sawi a; kum 2022-23 union budget-ah sum dah a ni ta a ni.

CM Zoramthanga chuan, bamboo link road atana sum hmuh cheng vbc. 100 chu pilot project tura tih a nih angin, sorkar laipuiin awlsam zawka an lo enfiah theihna tur Aizawl khawpui bul hnai lui ruam rem ṭhaahte hman phawt a nih dawn thu February 2, 2022-a thuthar thehdarhtute a kawmnaah a lo sawi tawh a ni.