Private player-te'n institution an din hi Sorkarin a thlàwp - Deputy CM Tawnluia

BN College of Nursing chuan nimin khan Dawrpui Multipurpose Hall-ah Lamp Lighting Ceremony vawi khatna an hmang a, deputy chief minister Tawnluia'n hmanpuiin, mimalte'n zirna-in an din chu sorkarin a thlàwp thu a sawi.

Deputy Chief Minister chuan, sorkarin thiam zirna chi hrang hrang mipui tan siam mah se, sorkar ringawtin a ti vek séng lo tih sawiin, "Ram changkang zawkte angin private player-te'n institution an din hi sorkar chuan a thláwp a, dàn zawm tur hrang hrang zawm erawh chu an tihmâkmawh a ni," a ti.

Nurse zir chu thil namailo a nih thu leh thiamna bik neia mi dangte damna thlentu nurse zirlai leh zir chhuakte chu rawngbawltu ropui an nih thu sawiin Tawnluia chuan, "Inpekna thûk tak, mi dangte tana nun inhuamna nei chunga zir leh thawh ngai a ni," a ti a; hrisel turin nau piang hlim aṭangin nurse service hrang hrang mi tinin an mamawh thu leh chu'ng atana inzirna tur nursing zirna Mizoramin a nei chu lawmawm a tih thu a sawi.

Inkhawmah hian nursing superintendent (Rtd) K Thansiami kaihhruaiin nurse 55 lukhum khumtir an ni a, bati chhiin thutiam an sawi. Khuallian Tawnluia'n BN College magazine a tlangzarh bawk.

BN College of Nursing hi BN Foundation Society hnuaiah Health & Family Welfare department-in phalna a pek hnuah December 1, 2020 khan din a ni a, B.Sc. Nursing zirna a ni. Batch khatah seat 30 a awm a, first semester zirlai 24, third semester zirlai 28 leh third year zirlai 27, an vaiin zirlai 79 an awm mek a ni.