CADC golden jubilee lawm a ni

Chakma Autonomous Diatrict Council (CADC) chuan nimin khan Chawngte Helipad-ah CADC kum 50 tlin, golden jubilee an lawm a, minister of state Robert Romawia Royte-in hmanpuiin, Chawngte khelmuala phûl lem phah thar a hawng nghal.

Robert Romawia Royte chuan, CADC-in kum 50 a tling chu a lawmpui thu sawiin, "Mizoram sorkarin Chakma area-a Lungsen aṭanga Chawngte inkara electric tower te, Chawngte P-ah community service centre te, Chawngte C-ah standard volleyball court leh basketball court te, Kamalanagar College-ah hostel building-te a sa mek a ni," a ti.

Hmasawnna hna thawh zel tum a nih thu sawiin Minister chuan, "Kamalanagar College behchhanin ICT department leh NIELIT ṭangkawpin IT Skill Centre an din dawn a, Chawngte leh Barapansury inkar kawngpui pawh PWD-in cheng vbc. 43.81 sêngin siam an tum bawk," a ti a; Chawngte leh Barapansury khaw chhung kawngpuite pawh SASCI sum hmanga siamṭhat a nih tur thu a sawi.

CADC golden jubilee lawmnaah hian MLA Nihar Kanti Chakma, Sports & Youth Services secretary Dr Lalrozama, CADC hotute an rel a; New Delhi, Tripura leh Bangladesh aṭangin palai an tel bawk.