Hunpuia Mamit himna tur sawiho

Mamit district bawrhsap Lalnunhlua kaihhruaiin nimin khan Mamita sorkar hotu te, khawtlang leh pawl hruaitute'n DC conference hall-ah Krismas leh kumthar vuakvêta dan leh thupek kenkawh dan tur an sawiho a; mipui him nan YMA, magistrate leh police-te ṭangruala duty ṭhin an rêl.

Ṭhutkhawmah hian mipui himna atana hmalak dan tur sawiho a ni a, mawhphurhna leh chanvo hrang hrang an insem nghal. Zu leh ruihhlo laka fihlim theih nan Excise & Narcotics department chu theihtawp chhuaha a tam thei ang ber endikna leh duty siam tura an duh thu an sawi.

October 16, 2022-a khapna thupek chhuah tawh - hâlpuah, hâlmawi leh silai lem (a mû nei kap chhuak thei) zawrh, hralh leh hman phal lohna thupek chu Mamit police-te'n chak lehzualin bawhzui se, dawr hrang hrang an endik tawhte chu uar lehzualin endik zui zel se, an ti.

YMA branch tinte'n an huam chhung ṭheuhah duty point siamin, mipui himna atan magistrate leh police-te nen ṭangkawpin duty ṭhin an rêl a; rûkrûk laka himna turin police-te'n a tam thei ang ber patrolling nei ṭhin se, YMA branch tinte'n YMA aurinna hmangin khapna thupek hrang hrangte uar taka puan ṭhin ni se, an ti bawk.

Ṭhutkhawmah hian Mamit SP bakah, Mamita sorkar department ṭhenkhat hotu te, khawtlang hruaitute leh tlawmngai pawl aiawhte an tel a ni.