KHAWTHLIR

Mizoramah Hripui vei hmu lo
December 19, Thawhṭanni khan Mizoramah swab sample 72 endik ni mah se, Covid-19 vei hmuh chhuah a ni lo a; Mizoramah hripui vei enkawl lai an awm lo. Mizoramah sample 19,92,696 endik tawhah Covid-19 positive 2,38,964 hmuh chhuah tawh a ni.

Aizawl DC Khapna thupek
Aizawl DC Dr Lalhriatzuali Ralte chuan, Krismas leh kumthar vuakvêtah boruak thianghlim lo leh bengchheng siam thei - hâlmawi leh hâlpuah te, kângmei tichhuak palh thei meithallàwn (sky lantern) te, mihring leh thil dang tana inhliam palh theihna silai lem (a mu kap chhuak thei)-te zawrh, hman leh hâlte khapna thupek a chhuah. Thupek bawhchhiate chu IPC Section 188 hmanga hrem theih an nih thu a tarlang bawk.

Thilpek sem
AMC Ward VIII corporator Christina Roluahpuii Sailo chuan nimin khan a bial huam chhunga taxi driver-te leh bazara chawhmeh zuar mi ṭhahnem tak hnenah Krismas thilpek a sem.

Kuhva châng zui zel
Bilkhawthlira kuhva chíngtute'n an khaw dáia dan loa ram dang ṭanga lâk luh kuhva chânga December 14, 2022 aṭanga chhun zan zawma an duty chu an la chhunzawm zel a, kuhva phurh man erawh an la nei lo. Kuhva chíngtute Thawhṭanni zana ṭhukhawm chuan, group YMA-te nen ṭanho a, kuhva phur lirthei kal theihna kawngpui dangte pawh vên a nih theih nan hmalak an rél a ni.

Lengpui KVK-in Hmalakna thlirho
Krishi Vigyan Kendra (KVK) Mamit District, Lengpui, chuan Scientific Advisory Committee (SAC) chuan nimin khan meeting an nei a, kum 2022 chhunga KVK Lengpui hmalakna leh report bakah kum 2023 chhunga an hnathawh tur action plan hrang hrang subject matter specialist-te'n an tarlang a, an thlirho nghal.