Hlawh bat tawh loh tum

Chief minister Zoram­thanga chuan, thla thar aṭang chuan sorkar hnathawk hlawh batsak tawh loh sorkarin a tum thu a sawi. He thu hi Ningania 1st Bn. MAP parade ground chei ṭhatna tur lungphùm a phùmnaa a sawi a ni.

CM Zoramthanga chuan, Covid-19 vangin kum 2020-21 Mizoram budget-in sum mamawh a daih loh thu sawiin, "Budget-in min daih loh avang hian sorkar hnathawk hlawh kan pûk a. Thla lehah chuan pûk loa a pangngaia kal hrâm hrâm kan tum," a ti. Finance department chuan, sorkar hnathawk hlawh chu June, July leh August chhung batsak turin ruahmanna a siam a, June leh July thla hlawh chu a lo batsak tawh a ni.