Sorkar hotute'n sum sawifiah an tum A chiang lo tual tual zawk - Duhoma

ZPM Legislature Party (ZLP) leader Lalduhoma chuan, Mizoram sum dinhmun chungchanga May 11, 2020-a statement a siama a tum ber chu mipuite'n phûr taka thawhlawm an thawh theih nan sorkar ṭawng chhuahtir a nih thu a tarlang a; chutih rualin, sawi­fiah an tumna lamah a chiang lo tual tual zawk nia a lan avangin a pawi a tih thu a sawi.

ZLP Leader hian statement a lo siam tawh sawifiahna Finance department-in an tihchhuah avangin nimin khan statement a tichhuak leh a; "Kan Chief Minister a 

ṭawng chhuak ta leh Finance-in thuchhuah meuh siama min rawn chháng ta hi hmasawnna chi khatah ka ngai a, lawmawm ka ti khawp mai," a ti.

ZLP Leader chuan, "Sorkar hian thawhlawm thawh tura mipui min beisei a nih chuan, harsatna kan tawh dan a tlangpui talin min hrilh se, lungawi taka kan thawh theih nan kan ti a ni ber. Sawifiah tumna lamah kan chiang lo tual tual zawk nite pawhin a lang a, a pawi hle," a ti a; sum dinhmun hriat vek an tum kher lo tih a sawi.

Lalduhoma chuan, sum hmuhna a tarlante chu a dik tlangpui tih Finance department thuchhuahin a pawm tih sawiin, "Dik lo deuh nia an sawi awmchhun chu, LESDE aṭanga sum hnuh khawm vbc. 21 ka tih kha a ni a, hei hi April 22, 2020-a kan CM thusawi behchhana ka sawi a ni a, a lo sual palh a nih chuan CM-in a sawi sual vang a ni ang," a ti.

Covid-19 léng vangin Mi­zoramin a sum hnár aṭanga hmuh a beisei a hmu pha dawn lo tih leh sorkar laipui aṭangin beisei ang a hmu dawn lo tih a chiang tawh tih sawiin Lalduhoma chuan, "Chuvang chuan, kan dinhmun nena inmila kan budget her rem (re-appropriate) turin special session neih ka rawt tawh a ni," a ti a; chutih laiin, thil sawi chian awm si loin sorkar hna­thawkte hlawh pawh hêk ṭhen tumna a awm hial tih a sawi.

Lalduhoma chuan, State Disaster Response Fund (SDRF) aṭanga cheng vbc. 23.50 state-in a dawn chu Covid-19 dona atana hman tur ni lo ang leh chuta ṭang chuan nuai 700 vel chauh an hman theih hmel thu Finance lamin an tarlang tih sawiin, "Ministry of Home Affairs-in office memorandum 33-05/2020/NDM-1 Dt 3.4.2020-a a inziah angin ka sawi chhâwng a ni," a ti a; MHA lehkhaah chuan Covid-19 chu India sorkarin notified disaster-a an puan tawh avangin Covid-19 do nan a bika ngaihhnathiamnain pek chhuah a ni tih a inziak tih a sawi. 

MHA lehkha anga SDRF sum hmanna tur tarlante chu - quarantine atan, sample endikna atan, screening atan, hmanraw (equipment) lei nan, laboratory atan leh relief measure hrang hrang atante a nih thu a sawi a, "Kan budget hi kan duh leh kan bai thei a, kan duh leh kan tlak thei a, kan kang thei bawk a; kan duh ang angin kan hmang thei tih kha hotute'n min zirtir dan niin ka hria," a ti.

Sum hmuh zat vbc. 882.37 anga Finance-in an tarlang chungchangah Lalduhoma chuan, "Hei ai hian ka sawi kha chu vbc. 5,000-in a tam zawk a. Chu chu February 25, 2020-a budget session-a hotupa berin min hrilh dan behchhana sawi ka ni," a ti a, a video pawh a la awm vek thu a sawi.

ZLP Leader chuan, sorkar sum hmuh zat an hre vek lo a, an hriat loh a la tam tur thu sawiin, "Kan own tax leh non-tax aṭang te, CSS leh a dangte aṭang pawhin sum eng emaw zat a lut ngei ang, kan hre ve phâk lo. SEDP atan ringawt pawh cheng vbc. 513 dah a ni a, CM-in a sawi angin hengte pawh hi hripui laka invèn nana hman theih zel turah kan ngai a ni," a ti.

Lalduhoma sawi danin, May 11, 2020 khan PM Economic Package aṭangin post devolution sum Mizoramin vbc. 118.50 a dawng thar a, post devolution chu thla tin deuh thawa dawn tur a ni. PM-CARES Fund vbc. 3,100 pawh insem tur a awm leh mek. Chu'ngte chu sorkar lamin, 'Covid-19 dona atana hman tur a ni lo' an tih tawh loh a beisei thu a sawi.

MLA Duhoma chuan, a statement-ah Mizoram sum hmuhna lam a tarlan laiin Finance department chuan a hmanna lam an tilang ve thung tih sawiin, "Loan rulhna te, power leina te, hlawh atante leh buhfai leina angte hi chu Covid-19 nena sawi pawlh chi niin an lang lo. Buhfai a thlàwna semte phei hi chu Central tum vek a ni a, dâl pawh sem tur a ni a, kan la dawng ve lo mai zawk a ni," a ti.