Sewage Treatment Plant hawn a ni

Deputy chief minister Tawnluia, UDPA leh PHE department enkawltu chuan nimin khan Bethlehem Vengthlang mawnga Chite lui kamah SIPMIU-in Aizawl thli sawngbawlna tur, 10 MLD Sewage Treatment Plant (STP) leh Sewarage Network (SN) an siam thar a hawng.

Tarlan danin, SIPMIU Sewage Treatment Plant hi Chite lui kamah kum 2013 aṭangin siam ṭan a ni a; North East Region Capital Cities Development & Implementation Programme (NERCCDIP) kaltlangin Asian Development Bank (ADB) aṭanga sum hmuh hmanga siam a ni.

Deputy Chief Minister chuan, Mizorama mihring thli leh tui bawlhhlawh sawngbawlna hmasa ber Sewage Treatment Plant hawn a ni chu hmasawnna a nih thu a sawi a, "Khawpui a ṭhan dawna thil pawimawh em em - thianghlimna, faina leh hriselna kawngah STP leh SN hawn tâk hi a ṭangkai hle dawn a ni," a ti.

Bawlhhlawh tihfai leh a paihna hmuna paih mai a tâwk tawh lo tih sawiin Tawnluia chuan, "Bawlhhlawh paih vûm thúr hian sik leh sá, boruak a tihchhiat avangin hriselna atan bawlhhlawh sawngbawl a ṭul tak meuh," a ti a; Aizawl hmar lam châwmtu tur tui lak dan buaipui mek a nih thu a sawi.

Minister of state Robert Romawia Royte pawhin thu sawiin, SIPMIU hmalakna hlawhtlinna hmuh belh chu Aizawl veng hrang hranga chhungkaw tam takin an chhawr ṭan mek tih a sawi a, "In aṭanga tui leh thli eng lai pawha chhuak hian leimin a siam thei a, chuvangin, mumal taka sawngbawl a ngai. Leimin leh lei che tur vênna atan SIPMIU hmalakna hi a ṭangkai dawn a ni," a ti.

Hawnna inkhawmah hian MLA pathum - C Lalmuanpuia, Ramthanmawia leh H Biakzaua te, Aizawl mayor Lalrinenga Sailo, deputy mayor R Thanglura leh Planning secretary Lalmalsawma Pachuau te pawh an tel a ni.