Healthcare bill táng chin-fel thuai beisei

MNF Media & Publicity department leh Mizo National Youth Front (MNYF) hruaitute chuan nimin khan Aizawl Press Club-ah thuthar thehdarhtute kâwmin, kum 2018 aṭanga MNF sorkar hmalaknate an tarlang a; February 2023-ah chhungkaw 70,000 hnenah SEDP ṭanpuina sum sem a nih dawn thu an sawi.

MNYF president Dr L Thangmawia, MLA chuan, kum 2023-ah India ram leh Mizoram economy a ziaawm chhoh an beisei thu a sawi a, "MNF sorkar hian kum khat vel kan la nei a, ram leh hnam tan theihtawp kan la chhuah zel dawn. Hun tlemtê kan la neih chhung hian min ṭawiawma theihtawp min chhuahpui turin Zoram mipui kan ngen a ni," a ti.

Sorkarin kawng a ngaih pawimawh thu sawiin L Thangmawia chuan, "Sum hi duh angin kan nei thei lo a, sum neih chhun ang ang hi chu kan CM hian kawngah a bel nasa," a ti a; central scheme a hlawhtlin theih nan sorkarin a thlàwp tlat thu leh hripui vang tih lohah chuan thil tihkhawmuan vak an neih loh thu a sawi.

MNF hruaitute chuan, Mizoram State Health Care Scheme-ah hripui léng vang­in sum indaih lohna awm rih mah se, rei lo têah bill tang­khang zawng zawng chinfel an beisei thu an sawi bawk.

MNF hruaitute chuan, kum 2019 leh a hnu lama inthlan hrang hrang - Lok Sabha, Aizawl Municipal Corporation, local council, village council, Lai Autonomous District Council, Chakma Autonomous District Council, Sinlung Hills Council, Sialkal Range Development Council bakah, Aizawl West-I leh Tuirial bial MLA by-election-ahte MNF an chak thu an sawi a, "Pathian leh Zoram mipui hnenah lawmthu kan sawi mawlh mawlh a ni," an ti.

Ram tan theihtawp an chhuah mek laiin March 2020-ah Covid-19 hripuiin Mizoram a thleng tih sawiin MNF hruaitute chuan, "Hripui lên hun chhung khan lockdown chi hrang hrang ni 718 kan hmachhawn a ni," an ti a; African Swine Fever (ASF) vangin harsatna tam tak a thlen zui bawk thu leh, khawchhak lamah lirnghing leh Assam nen ramri buaina nasa takte an hmachhawn thu an sawi bawk.

MNF hruaitute chuan, harsatna hrang hrang vanga an tum leh duh angin hna an thawk thei lo nia sawiin, "Zoram mipui hriatthiamna kan dil a ni," an ti. MNF Media & Publicity department leh MNYF hian Mizoram mipuite Krismas chibai an bûk a ni.

MNF MEDIA & MNYF TARLAN ṬHENKHAT
■ Kohhran leh mipui duh dan angin zu zawrh tihtawp a ni.
■ Kum 2008-a MNF sorkarin district thar pathum a puan tawh chu kum 10 hnuah function tir a ni.
■ Zampui tlangdungah MST bus service tir a ni.
■ Horticulture department-in hripui lên vanglaiin vegetable supply chain an siam.
■ Leilet atan buh ṭin 800 hmun nawr zàwl a ni tawh a, vaimim herna khawl 200 bun tura hmalak mek a ni.
■ PM Kusum hnuaiah solar tui pump-na unit 1,700 pek tura ruahman a ni.
■ Buhfai, eirawngbawlna gas leh thil dangte hnianghnâr taka hmuh a ni.
■ Aizawl by-pass Road leh bamboo link road atan hmalak mek zel a ni.
■ Aizawl hnuaia lei verh siamna tur sorkar laipuiin a pawm.
■ Health sub-centre 247 chu health & wellness centre-ah hlankai a ni a, health & wellness officer 240 lak a ni.
■ Health sub-centre la awm ngai lohna khaw 327-ah health clinic centre hawn thar a ni.
■ Kum 2028-ah Super Speciality Cancer Hospital hawng hman tura hmalak a ni.
■ Khaw 100 chuangah tui thianghlim hnianghnâra pek nan nizung chakna hmanga tui lâk hna thawh mek a ni.
■ Mizo Language Development Board din a ni.
■ Zirtirtu regular 152 leh muster roll 880 lak thar a ni.
■ Samagra hnuaiah elementary school pahnih leh high school pakua hawn a ni.
■ Hindi zirtirtu M/S-ah 627 leh H/S-ah 191 lak a ni.
■ Khelmual tam takah phullem phah zawh a ni tawh a, phah mek zel a ni.
■ Racetrack siam hna chak taka kalpui mek a ni.
■ Lunglei Zohnuaiah Science Centre leh Digital Planetarium sak zawh a ni.
■ MZU Southern Campus dinna turin Pukpui Mausep ramah land lease tihfel tawh a ni a, central sorkar aṭangin approval a thuphungin hmuh a ni tawh.
■ Lunglei Municipal Council din a ni a, remchang hmasa berah inthlan buatsaih tura hmalak a ni.