Minister-in vaimim herna kháwl a vailiam

Agriculture department-in SEDP hnuaia vaimim herna tur khâwl an sem chhuah turte chu nimin khan Agriculture minister C Lalrinsanga'n Agriculture directorate kawt aṭangin a vailiam.

Vaimim herna khawl sem inkhawm hi Agriculture secretary J Hmingthanmawia'n a kaihruai a, executive engineer Lalchhanliana'n khawl chanchin leh an lei dante a sawifiah. Khawl chu Lalzui Research Foundation siam a ni a, darkar khatah vaimim kg. 275 a her thei a ni.

District hrang hranga hman turin nimin khan vaimim herna khawl 50 sem a ni a; National Innovation Foundation bultumin buhpáwl chan sawmna khawl leh telhàwng channa khawl sem chhuah a ni bawk.

Agriculture Minister chuan, "Zoramin kan ei leh bar mamawh phai aṭanga kan châwk luh tam lutuk tihziaawm nan agriculture sector-ah nasa takin hma kan la a, mahse, hmabak a la thui hle," a ti a; vaimin herna kháwl sem chhuahte chu tam zawk thar a nih theihna tur hmanrua ni se a duh thu leh, nasa taka ṭan la a, rim taka thawkte chu an hlawhchham loh tur thu a sawi.

C Lalrinsanga chuan, Mizoram páwn aṭanga lak luh tihtlem chu economic development a ni ngawt lo tih sawiin, "Kan thar chhuah ringtu an awm a ngai a, chu chuan sum min lak luhtir ang. Kan thlai thar hmanga Zoram páwn aṭanga sum lak luh kan tum tlat tur a ni a, chumi thleng tur chuan hmabak kan la ngah lutuk, i ṭang zual sauh sauh ang u. Kan theihna hian a tlin a, rilru lam hi kan sawhngheh zual deuh a ngai mai zawk a ni," a ti.

Agriculture EE Lalchhanliana chuan, vaimin herna khawl leina tur sum SEDP-ah dah a nih thu leh open tender hmangin department-in khawl an zawn hnuah Lalzui Research Foundation-in khawl an siam chu thlan a nih thu a sawi a; Rashtriya Krishi Vikas Yojana (RKVY) aṭangin khawl eng emaw zat lei theih beisei a nih thu a sawi bawk. Khawl chu kg. 25-a rit a ni a, Rs 34,944 man a ni.