Naktuk aṭangin Aizawl khawpuiah 'No Vehicle Zone' kalpui dawn

Aizawl khawpuiah naktuk aṭangin Zodin Square leh Chanmari kâwn inkarah No Vehicle Zone kalpui a ni dawn a, chawhma dar 10 aṭanga tlai dar 4 thleng lirthei tlân theih a ni dawn lo.

No Vehicle Zone kalpui chhungin Zodin Square leh Chanmari kâwn (Lower Chanmari, Bazarpui panna kawng telin) inkarah chawhma dar 10 aṭanga tlai dar 4 inkar chhungin lirthei eng chi mah tlân phal a ni dawn lo a, thirsakawr leh nawrlirhte pawh a huam dawn a ni. Damdawi-ina emergency duty leh dam lohna vanga damdawi-in pante a huam lo thung.

Lirthei tlân phal lohna hmun leh hun siam hi December 24, Inrinniah chhunzawm a ni dawn a; December 31, 2022-ah kalpui leh a ni bawk ang.

Aizawla No Vehicle Zone kalpui turin ruahmanna hrang hrang siam a ni a; chutih laiin, ruahmanna siamte chuan chhiatrupna thil, kângmei leh rîkrum pawimawh bika duty, dan leh thupek kenkawhna pawimawh bika police leh magistrate duty-te chêt velna a huam lo a ni.

Aizawla No Vehicle Zone kalpui hi Coordination Committee on Traffic Management hotute December 9, 2022-a ṭhukhawm chuan an lo rêl tawh a; No Vehicle Zone kalpui a nih chhan chu, Krismas leh kumthar vuakvêta bazar tura mipui kea kalte him zawkna atana tih a nih thu sorkar thuchhuahin a tarlang.

NO VEHICLE ZONE PAWIMAWH ṬHENKHAT
■ No Vehicle Zone huam chhungah kawngpui dungah thil zawrh leh bungrua dah khap tlat a ni.
■ No Vehicle Zone huam chhung kawngpuiah lirthei hûn/dah phal a ni lo.
■ No Vehicle Zone chhungin lirtheite kawngpui dangah tlân a ngai dawn a, hêlna kawngpui sirah lirthei leh bungrua dah phal a ni lo.
■ Chhim lam aṭanga hmar lam pante tan Zodin Square-ah AR Mandir hêlin kual theih a ni.
■ Hmar lam aṭanga chhim lam pante tan Chanmari Presbyterian Kohhran biak-in hnungah kual let tur a ni.
■ Electric Veng lam aṭangin Bazar Bungkawnah chhuah chhoh phal a ni lo a, Modern HSS bulah kualin, Chhinga Veng lamah lêt theih a ni. Chhinga Venga Tuithiang/Bethlehem panna péng aṭangin Saron Veng lamah tlân chhoh phal a ni lo.
■ Civil Hospital, Aizawl aṭanga lirthei chhuak, chhim lam pan tur chu Dawrpui biak-in lamah kual loin, Bazar Bungkawnah tlân thlâk nghal tur.
■ No Vehicle Zone huam chhunga taxi leh two wheeler taxi stand-te chu Baza tlang hnuai, AR Mandir epa general parking-ah leh AR Quarter Guard hnuaia general parking lot-ah sawn a ni ang.
■ Hmar lam aṭanga tlân, maxicab leh a hnuai lam tan passenger dah leh la tur ringawtin Chanmari kâwn aṭangin Mizo HS Field thleng an tlân chho thei a, Mizo H/S Field chu parking atana hman tur a ni. Chhuah leh dawnah Chanmari lamah tlàn tur a ni a, Zarkawt kàwn lamah tlàn thlâk phal a ni lo.

Lirthei dah phal lohna hmunte
1. Mizo H/S Field leh Hrangbana College inkar kawngpui sirah lirthei dah phal a ni lo.
2. Temple - Vaivakawn kawngpui.
3. Vaivakawn - Hunthar Veng, Chanmari West pengṭhuam.
4. Hunthar Veng - Chanmari West - Chanmari kâwn.
5. Bawngkawn - Sikulpuikawn via Ramhlun - Aizawl Venglai - Electric Veng - Chhinga Veng - Tuithiang - Bethlehem - College Veng - Republic Veng - Upper Republic/Treasury Square.
6. Armed Veng - Chhinga Veng.
7. Ramthar Sihpui - Chhinga Veng via Electric Veng.