P Rohmingthanga vui liam

Mizo zinga Aizawl bawrhsap hmasa ber leh India sorkara secretary ni thei awm chhun P Rohmingthanga (86), IAS (Rtd) chu December 20, Thawhlehni zan dar 10 khan Pneumonia leh natna dangte vangin a thi a, nimin khan vui a ni.

Thu dawn danin, P Rohmingthanga h/o Laldingliani hi April 4, 1936-ah Bualpui-H ah a piang a, Delhi-a MA a zir laiin UPSC exam-ah tlingin, kum 1961 khan IAS-ah a lut. IAS officer a nih angin hna hrang hrang a thawk a, kum 1973-1976 chhung Aizawl DC niin, Mizo zinga Aizawl DC hmasa ber a ni. Kum 1987-1988 chhung Mizoram chief secretary a ni a, IAS a nih anga hna a thawh chhungin Mizoramah kum 5 vel chiah a awm.

P Rohmingthanga hi kum 1993 aṭangin sorkar laipuiah secretary niin, kum 1996-a a pension thleng khan secretary a ni a, Mizo zinga sorkar laipuia secretary hmasa ber a nih bakah, tun thlengin a awm chhun a ni. A pension hnuah Andaman & Nicobar Islands, Dadra & Nagar Haveli, Daman & Diu and Lakshadweep tan election commissioner a ni a, ICFAI University, Mizoram vice chancellor a nih bakah, hna dang dang a thawk leh bawk.

Hmun, in leh thil hlui humhalhtu pawl, Indian National Trust for Art and Cultural Heritage (INTACH), Mizoram Chapter-ah life member a ni a, kum 2010 aṭanga a thih thlengin convener a ni.