Thla hnih hlawh bat mek Krismas hma ngeia pe turin CLP-in sorkar an phût

Congress Legislature Party (CLP) chuan thuchhuah siamin, Mizoram Samagra Shisha hnuaia thawkte hlawh Mizoram sorkarin thla hnih a batsak tawh tih a tarlang a, Krismas hma ngeia hlawh pe turin sorkar a phût.

CLP chuan, Krismas urlâwk leh inpuahchaha induhthawh a nat lai taka Federation of Mizoram Samagra Employees (FEMSE) member mi 4,500 velte'n thla hnih hlawh an la thei lo chu pawi a tih thu an tarlang a, "Kumin October leh November thla hlawh vawiin December 21 thlenga la thei loa ngaihsak an hlawh lo hi an lainatawm a, sorkar hian a hna thawktute hlawh rang taka pe turin kan phût a ni," an ti.

An thawh hlawh ngei la tura FEMSE hruaitute'n sorkara nawra hun leh thâ an séng fo chu thil hriat hrehawm tak a nih thu sawiin CLP chuan, "An thawh hlawh, an chanvo dik tak hi Chief Minister leh Finance changtu Pu Zoramthanga kaihhruai sorkar hian nawr ngai loin kumin Krismas hma ngei hian an hlawh pe rawh se," tiin an tarlang.

Congress Legislature Party chuan, "Mizoram nghahfâk tur kan tu leh fate enkawla zirtirtute hi sorkar hian sorkar a nihna angin, an hlawh pek hi mawhphurhnaah la ngam rawh se. Contractor leh supplier ṭhenkhatin rang taka sum tam tak bill an lak zung zung theih laia ram leh hnam ro tana thawktute ngaihthah hi a thiang lo," an ti a; sum awm remchang ang ang hmanga Samagra hnuaia thawkte harsatna chingfel turin sorkar an phût tih an tarlang.

CLP tarlan danin, FEMSE hi August 23, 2019 khan Samagra Shiksha hnuaia pawl parukin an din a, tunah pawl 10 tel mekin, member 4,500 chuang an awm. District tinah sub-headquarters an din vek tawh a ni.
FEMSE-a tel pawlte chu - Mizoram SSA Teachers' Association, Mizoram RMSA Employee Welfare Association, SSA Resource Person Association of Mizoram, Mizoram Instructor Association, Mizoram Samagra Management Staff Association, Samagra Academic Support Staff Association, SEAM Marakanda, Mizoram Hindi Shikshak Sangh CAS leh Special Educator Association (Elementary)-te a ni.