LṬP-in Bhavya bungraw thiar chhuak tur an dan chungchang PWD an sawipui

Lunglei Ṭhalai Pawl (LṬP) hruaitute chuan December 19, 2022 khan Lunglei DC pisaah PWD hotute an kawm a, Aizawl-Thenzawl-Lunglei (ATL) kawng siamtu Bhavya company-in an bungruate thiar chhuah an tum, LṬP-in an dan chungchang leh ATL kawng thawm ṭhat chungchang an sawipui.

Lunglei kawng siamtu Bhavya company chuan December 17, 2022 khan an hmanrua leh bungruate lak chhuah an tum a, LṬP-te'n remti loin an dang a ni. LṬP hian, PWD-in Bhavya company security deposit hmangin kawng an siam dawn tihchianna document leh kawng siam dan tur design hmuhtir an ngiat a ni.

LṬP tarlan danin, LṬP hruaitute leh Lungleia PWD hotute inkawmnaah hian PWD aiawhte chuan Bhavya company-te contract neih mek tihtawp (terminate) turin PWD Chief Engineer pawmpuina nghah mek a nih thu leh, chumi chhung chuan a báin kawng khuar hnawh a nih thu an sawi.

Kum 2020-a hna thawh zawh tawh, defect liability period (kum thum) pawh a zawh ṭêp tawh hnuah leh Bhavya-in an hna an tlin lo hle tih hre reng chunga October 2022, LṬP-in FIR an thehluh hnuah chauh PWD-in action la a, de-entrustment an tichhuak chauh chu ṭha an tih loh thu LṬP hruaitute chuan an sawi a ni.

Bhavya company leh PWD ten inremna an neih tawh angin, kawng thawm ṭhat hna kalpui zel tum a nih leh nih loh LṬP hruaitute an zawhna chu PWD hotute chuan, short term leh long term angin thawm ṭhat hna kalpui an tum thu an sawi a; Tlawng leh Pukpui inkar chu siamṭhat hlawk (full reconstruction) tum a nih thu leh chumi atan chuan sum tam tak a ngaih dawn avangin sorkarah sum dil a nih tur thu an sawi bawk.

ATL kawnga Bhavya hnathawh a chhiat em avanga contract titawp tura hmalak a nih mek laia Mizoram hmun hrang hrangah Bhavya-in hna an la thawk reng si chu mak an tih thu leh hriatthiam har an tih thu LṬP hruaitute chuan an sawi a, a chhan PWD hotute an zawt.

High court-a PIL thehluhah PWD leh Bhavya chu a kaihhnawih (respondent) an nih ve ve a, court-a thu kal lai a awm mek chunga Bhavya contract tihtàwp tum chu Bhavya chhan tumna a nih leh nih loh an zawt bawk.

PWD hotute chuan, Bhavya company sum an hrèn hmangin ATL kawng chhia siam tum a nih thu an sawi rualin, sumin a daih dawn loh thu an sawi.

LṬP chuan, study team-in an report PWD Engineer-in-Chief pisaa an thehluh ang leh an rawtna anga ATL kawng siam tum a nih chungchangah, minute-a an pawm ang ngeia siam an phût thu leh an vil zui reng dawn thu an tarlang bawk.