Minister-in Lianchhiari Rûn sak mek a tlawh

IPR department-in an directorate building bula Lianchhiari Rûn an sak mek chu nimin khan IPR minister Lalruatkima'n a tlawh a, hmalakna kal zel dan tur department hotute a sawipui.

Lalruatkima chuan, Lianchhiari Rûn sak mek chu office atan hman a nih dawn bakah, mipui hman theih turin mini theatre, conference hall, conference room, exhibition tihna hmun leh lirthei dahnate a awm dawn thu a sawi a; parking fee leh hall hmanna aṭangin in chu a inenkawl zo tura ruahman a nih bakah, sorkar tan sum a thawk chhuak thei dawna a lan thu a sawi.

IPR Minister chuan, in chu a chhung cheina tura bungrua leh mamawh dangte chu NEC ruahmannaah a tel loh avangin, Planning department-ah dil mek a nih thu a sawi a; in satu contractor chu tun sorkar kum kal mek 2022-23 ral hma ngeiin sa zo hman turin a ngen bawk.

Lianchhiar Rûn sakna atan hian North Eastern Council aṭangin cheng nuai 1,000 hmuh a ni a, sum ruahman zinga 90% chu NEC tum niin, 10% chu Mizoram sorkar tum a ni. Chawng sarih a ni a, hna thawh tur zinga 95% vel zawh a ni tawh. Lirthei ke phahih nei 70 vel leh ke pali 40 vel dah thei tura ruahman a ni.