KHAWTHLIR

Gynaecology Camp
Assam Rifles-te chuan AR Civic Action Programme hnuaiah nimin khan Mimbung khuaah Gynaecology Camp an buatsaih a, mi 267 an inentir. Camp hi ramri hnaiha awmte ṭanpuina chi khat atana buatsaih a ni a; 2nd Assam Rifles-a gynaecologist Dr Ramakant Sharma leh chief medical officer ten inentirte dinhmun an enfiah a, a ṭul angin damdawi a thlawnin an pe bawk.

Hripui vei hmu lo
December 20, Thawhlehnni khan Mizoramah swab sample 52 endik ni mah se, Covid-19 vei hmuh chhuah a ni lo. December 15, 2022 aṭangin Mizoramah hripui vei hmuh chhuah a ni tawh lo a, Mizoramah hripui vei enkawl lai an awm lo bawk. Mizoramah sample 19,92,748 endik tawhah Covid-19 positive 2,38,964 hmuh chhuah tawh a ni.

CADS heroin man
Central YMA hnuaia ruihhlo dotu, Central Anti Drug Squad batch hnihnate chuan November 18, 2022-a mawhphurhna an lak aṭanga nimin thleng khan Rs 1,21,87,400 hû heroin an man tawh. Heroin man kaihhnawihah mi eng emaw zat an man tawh a; mi pakua chu Excise/Police hnenah hlanin, mi 13 chu Home-ah an dah a, counselling class kal lai mi 117 an awm bawk.

Krismas thilpek
Minister R Lalzirliana chuan December 20, Thawhlehni leh nimin khan a bial, Ṭawi constitiency chhunga kum 80 chin chung lamte tan Krismas thilpek a hlân. Minister hian a biala kum 80 tling tawh mi 375 hnenah blanket pakhat ṭheuh a pe a ni.

PC thalaiin thláwp
Peoples' Conference party ṭhalaite chuan thuchhuah siamin, two wheeler taxi-a ei zawngte nékchêp zawnga Mizoram sorkarin intlan chhawk dan thar a ruahman chu Mizoram sorkarin ṭhalaite hmakhua a ngaih lohzia tichiangtua an ngaih thu an tarlang a; two wheeler taxi permit pe chhuak tawh lo tura two wheeler taxi neitu pawl ngennate chu tihlawhtling ngei turin sorkar an phût a ni.