Chennai-ah Mizo nulain Covid-19 a kái Chennai aṭanga hawte vawiinah beisei

Chennai khawpuia dental surgeon (specialist zir mek) Mizo hmeichhe pakhatin Covid-19 a vei tih May 13, Nilaini khan hmuh chhuah a ni a, damdaw-inah enkawl nghal niin, ngaihtuahawm a ni lo. Hetih lai hian, Chennai aṭanga Mizo rawn haw mek, mi 975-te chuan vawiin hian Bairabi an thlen beisei a ni.

Chennai aṭanga thu dawn danin, Tamil Nadu state chhungah damdawi-in indaih lohna avangin Covid-19 vei zinga la naupang leh ṭhalai deuh, hrisel ṭha pangngai leh hripui vei vanga harsatna la nei lote chu in lama inenkawl tura tih an ni ṭhin a, Mizo nula kai thar pawh an hostel-a inenkawl tura tih a ni. Chutih rualin, a awmna hostel-a awm ve dangte'n an hlauh avangin Chennai Mizo Welfare Association (CMWA) hruaitute'n thuneitute an biak hnuah damdawi-ina VIP room-ah dah a ni.

Mizo nula hi tuna Chennai aṭanga Mizoram lam pana rawn haw mek zingah a tel lo a, Chennai aṭanga rawn haw mekte nen pawh an inkâwm ngai lo. A awmna hostel-ah Mizo dang an awm lo a, zirna avangin hostel-ah a awm deuh chawt a, Mizo dangte nen intlawhpawh loin, zirnaah an ṭul avangin Mizo thil tih khâwmah pawh a tel ngai lem lo niin CMWA hruaitute chuan Vanglaini palai an hrilh.

CMWA hruaitute chuan, "Tuna Mizoram pana haw mekte nen hian hriat pawlh loh kan duh a, an intlawh pawh loh avangin mipui tán chî-âina tur a awm loah kan ngai," an ti.

Tamil Nadu leh Puducherry-a Mizo tangkhang, Chennai aṭanga rawn haw mekte hi an vaiin mi 975 an ni a; Aizawl district mi 404, Lunglei district mi 48, Serchhip district mi 34, Kolasib district mi 50, Champhai district mi 87, Siaha district mi 139, Mamit district mi 93, Lawngtlai district mi 54, Khawzawl district mi 14, Hnahthial district mi 21 leh Saitual district mi 31 an ni.

Rawn haw mekte hi vawiinah rélin Bairabi chawlhhmun an thlen theih beisei a ni a, anmahni dawngsawng turin sorkarin ruahmanna a peih tawh. Bairabi an thlen hunah screening point 10-ah enfiah an ni dawn a, enfiah zawhah an hawna tur lirthei hmangin Bairabi khaw chhung paltlang tam lo thei ang bera hawtir an ni ang. Ei leh in inpek dan tur ruahman a ni tawh a, kawng lakah ding khawtlai loin, an thlenna tur hmun pan ding nghal tur a ni.