Mipui harsatna hrethiam turin Congress ṭhalaiin sorkar an phût

Mizoram Pradesh Youth Congress Committee (MPYCC) chuan thuchhuah siamin, in­khârkhip thlahdul deuh ni tawh mah se, nunphung pangngai anga zalênin mipui an la awm thei lo tih an tarlang a; chuvang chuan mipui harsatna hrethiam turin Mizoram sorkar a phût.

MPYCC chuan, inkhârkhip chu May 4 aṭangin thlahdul deuh ni mah se, sumdawngte'n an duh angin dawr an la hawng thei lo a, sumdawnna lirtheite pawh an phurh theih zatve chauh phur tura tih an nih thu an sawi a; chutih laiin sorkar­in sumdawngte manganna leh harsatna ngaihtuah loin a rang thei ang bera Goods & Service Tax (GST) return file ti vat turin thu a pe tih sawiin, "Hei hian sumdawngte rilru a tina hle a ni," an ti.

Congress ṭhalaite chuan, lirthei license renew fee leh motor docu­ment-a chhiah pek hun leh lockdown a innan avangin chhiah pek theih a ni lo tih sawiin, "Fee hi ngaihhnathiamna awm loin late fee nen an chawi­tira hriat a ni," an ti a; hmun ṭhenkhata maxicab counter license neitute pawh chhiah an pek loh avangin ticket pe chhuak tawh lo tura hriattir an nih thu an sawi.

Hun harsa leh khirh a nih mek laia Mizoram sorkar chêt dan chu rilru nat thlak an tih thu sawiin MPYCC chuan, "State ṭhenkhata lirtheia eizawngte sorkarin ṭanpuina an pek hial laia hriat­thiamna nei loa sor­kar a che hi mak kan ti hle a ni," an ti a; sorkar chu mi harsatna hriatthiampui turin an phût a ni. 

MPYCC chuan, inkhàr­khip chhunga electric bill khawn loh thla hnih bill khawnna tih­chhuah mek a ni tih sawiin, "Electric bill nasa taka tihpun a ni a, MPYCC-in bill tisang lo tura kan ngenna ngaih pawimawh a ni lo. Bill thar hmanga thla hnih bill khawn mek hian mipui phurrit nasa takin a siam a ni," an ti bawk.